रायपुर, राम वन गमन पर्यटन परिपथ समारोह के दूसर दिन काली माता कौशल्या मन्दिर चंदखुरी म सांस्कृतिक कार्यक्रम म राजनांदगांव के एकता मानस सिन्हा परिवार ह जस जगराता अऊ भजन के शानदार प्रस्तुति गीस। छै सग्गे बहिनी मन छतीसगढ़ी म मोर गांव के शीतला माता…अऊ छत्तीसगढ़ के राजकीय गीत अरपा पैरी के धार संग आन गीत मन ल अपन अंदाज म प्रस्तुत करके दर्शक मन के अड़बड़ वाहवाही लूटिन।
सांस्कृतिक कार्यक्रम के श्रृंखला म एकता मानस सिन्हा परिवार ह श्री राम के लीला मन के वरनन करिस। आपसी जुगलबंदी ले गीत अऊ संगीत ले ये छैयो बहिनी मन ह कार्यक्रम म उछाह अऊ जोश भर दीन। छैयो बहिनी मन म ले दुर्गा सिन्हा ह अपन मधुर स्वर ले सबला अपन कोति आकर्षित करिस। श्रद्धा सिन्हा ह ढोल, तनुजा सिन्हा ह ऑर्गन, अंजलि सिन्हा ह बेंजो, नूतन सिन्हा ह बाँसुरी अऊ डॉली सिन्हा ह ऑक्टोपैड म अपन हुनर देखात दर्शक मन ल मंत्र मुग्ध करिन। कार्यक्रम म भारी संख्या म पहुंचे मनखे मन ह छत्तीसगढ़ सरकार के ये आयोजन के अड़बड़ सराहना करिन। ग्रामीण बालमुकुंद, जवाहरलाल, उमेश यादव, संजू देवांगन, पूनम सिन्हा, श्रीमती दुलारी बाई, ऊषा यादव, रेणु साहू, अंजुलता अऊ पवन साहू ह बताइस कि चंदखुरी म ओ मन पाछू कई साल ले माता कौशल्या के मंदिर म दर्शन करे आत रहिन। सरकार कोति ले श्री राम के ऊंचहा प्रतिमा स्थापित करे के संग आसपास के तालाब के सौंदर्यीकरण करके पर्यटन स्थल के रूप म विकसित करे ले इहां के महत्ता बाढ़ गे हे। आज चंदखुरी के पहिचान अऊ बाढ़ गे।
छै सग्गे बहिनी मन ह जस जगराता अऊ भजन ले समा बाँधिन
