सियान जतन क्लिनिक योजना – दू महीना म 4000 ले जादा सियान मन ल मिलिस लाभ
हरेक बिरस्पत के लगथे जाँच अउ उपचार शिविर
13 जुलाई 2022
छत्तीसगढ़ सरकार कोति ले लोगन मन ल बने स्वास्थ्य सुविधा बर सरलग बूता करत हावय। सियान मन के स्वास्थ्य के खियाल रखे बर सरकार विशेष बूता करत हे। सियान जतन क्लिनिक योजना एकरे एक ठो हिस्सा हरे। 60 ले जादा उमर के सियान मन के बने स्वास्थ्य परीक्षण अउ उपचार होवत हावय।
मई महीना ले महासमुंद ज़िला म ये योजना म 36 ठिन आयुर्वेद अस्पताल व हेल्थ केंद्र मन ले सियान जतन क्लिनिक के शुरूआत होए हे, जिहाँ 60 ले अधिक उमर के नागरिक मन के निः शुल्क स्वास्थ्य परीक्षण अउ उपचार चलत हे। येकर अंतर्गत सबो किसम के जांच, आयुर्वेदिक दवा अउ पंचकर्म जइसन सुविधा मिलत हे। महीना के पहिली बिरस्पत के समारोह पूर्वक सियान जतन क्लिनिक के आयोजन अउ आने बिरस्पत के जाँच अउ उपचार शिविर आयोजित करे जाथे। पीछु दू महीना म 4190 झिन सियान मन ल येकर फायदा मिले हे। मई महीना म 1432 अउ जून महीना म होवइया शिविर म 2758 झिन सियान मन के उपचार करे गीस। संगे-संग 60 बछर ले अधिक आयु के मरीज मन के फोकट म पंजीयन, सामान्य स्वास्थ्य परीक्षण, प्रकृति परीक्षण अउ चिकित्सा करे गीस। जाँच शिविर मन म सुरता भुलई (स्मृति ह्रास), कम सुनई परना, नेत्ररोग, जोड़ा के दर्द, लकवा, मधुमेह, उच्च रक्तचाप अउ शारीरिक दुर्बलता इत्यादि शामिल हे। चिकित्सालय के सियान जतन क्लिनिक म लाभार्थाी मन ल ग्रीष्म ऋतु पेय मिश्रेय पानक, दशमूल काढ़ा, गुडुच्यादि काढ़ा, रसायन औषधि आदि प्रदान करे गीस। येकर छोड़ लोगन ल एके जगा म आयुर्वेद अउ एलोपैथी के विशेषज्ञ मन के परामर्श उपलब्ध होथे। सियान मन के स्वास्थ्य बने राहय अउ उन ल कोनो किसम के परेषानी झन होवय तेकर बर कई किसम ले बूता होवत हे। आयुष विभाग ल येकर जिम्मेदारी दे गे हवय।