रायपुर, प्रदेश के उद्योग मंत्री श्री कवासी लखमा ह महासमुंद प्रवास के बेरा म जिला मुख्यालय के वार्ड नंबर 11 म करीबन 32 लाख रूपिया ले जादा के लागत ले बने सर्वसुविधा वाला नवा बने सियान सदन के लोकार्पण करिस। ए अवसर म महासमुंद के विधायक श्री विनोद चन्द्राकर, बसना विधायक श्री देवेन्द्र बहादुर सिंह, खल्लारी विधायक श्री द्वारिकाधीश यादव, महासमुंद नगर पालिका परिषद के अध्यक्ष श्री पवन पटेल, नगर पालिका परिषद उपाध्यक्ष श्रीमती कौशिल्या बंसल, पूर्व विधायक डॉ. विमल चोपड़ा, कलेक्टर श्री सुनील कुमार जैन, पुलिस अधीक्षक श्री संतोष कुमार सिंह, मुख्य नगर पालिका अधिकारी श्रीमती प्रीति सिंह संग जनप्रतिनिधि, पार्षदगण, गणमान्य नागरिक, अधिकारी-कर्मचारी बड़ संख्या म उपस्थित रहिन।
वृद्धाश्रम के लोकार्पण अवसर म उद्योग मंत्री श्री लखमा ह अपन उद्बोधन म कहिन कि वृद्धाश्रम कोनो समाज के मंदिर ले बढ़के हे, जऊन सियान मनखे मन के देख-रेख करइया कोनो नइ हे, ऊंखर बर ये व्यवस्था करे गए हे, सियान माता-पिता के सेवा करना हम सब के जिम्मेदारी हे। उमन कहिन कि वृद्धाश्रम वो सियान नागरिक मन बर होथे, जऊन ल अपन परिवार नसीब नइ होवय या निराश्रित होथे। जऊन सियान मनखे मन के कोनो ठिकाना नइ होवय अऊ कोनो सहारा देवइया नइ होवय, ओ मन ल वृद्धाश्रम के माध्यम ले सुरक्षित आश्रय देना सरकार के काम ये।
महासमुंद विधायक श्री विनोद चन्द्राकर ह संबोधित करत कहिन कि वृद्धाश्रम म वरिष्ठ नागरिक अपन सुख-दुख आपस म बांट सकहीं। राज्य शासन कोति ले हर एक मनखे ल सुखमय जीवन-यापन कराए बर बहुत अकन योजना बनाये गए हे। महासमुंद नगर पालिका परिषद के अध्यक्ष श्री पवन पटेल ह कहिन कि सियान माता-पिता जिंकर कोनो आशियाना नइ हे, ऊंखर बर सर्व सुसज्जित 10 कमरा संग हाल, किचन, डायनिंग हाल अउ बाथरूम बनाय गए हे। एखर अलावा इहां वरिष्ठ नागरिक मन ल कोनो प्रकार के परेशानी झन होवय एखर बर हर संभव प्रयास करे जाही। कार्यक्रम के बाद वृद्धाश्रम प्रांगण म अतिथि मन कोति ले पौधरोपण करे गीस। ए अवसर म श्री आलोक चन्द्राकर, श्री राजेन्द्र चन्द्राकर, श्री दाऊलाल चन्द्राकर संग आन गणमान्य नागरिक उपस्थित रहिन।