छत्तीसगढ़ ल स्किल हब बनाए के दिशा म ऐतिहासिक पहल

मुख्यमंत्री श्री विष्णुदेव साय ह कहिन समाज के हर वर्ग के भागीदारी ले ही बनही विकसित छत्तीसगढ़
स्किल इंडिया मिशन ह देश के तस्वीर बदल दिस, अब छत्तीसगढ़ ह नवा इतिहास बनावत हे – मुख्यमंत्री श्री साय
दुर्ग, मुख्यमंत्री श्री विष्णुदेव साय ह कहिन के हम विकसित भारत विकसित छत्तीसगढ़ के लक्ष्य के प्राप्ति बर सरलग काम करत हन, अऊ एमा समाज के हर वर्ग के सक्रिय भागीदारी जरूरी हे। मुख्यमंत्री श्री साय आज भिलाई के रुंगटा विश्वविद्यालय म आयोजित विश्व युवा कौशल उत्सव 2025 के समापन समारोह ल संबोधित करत रहिन। मुख्यमंत्री श्री साय ह कहिन के ए आयोजन इतिहास म सोनहा आखर म दरज होही। गोल्ड बुक ऑफ वर्ल्ड रिकॉर्ड्स के टीम ह एक सप्ताह के भीतर 8183 प्रतिभागी मन ल देहे गए प्रशिक्षण ल प्रमाणित करे हे अऊ संस्थान ल एखर बर प्रमाण पत्र प्रदान करे हे। उमन रंगाटा विश्वविद्यालय प्रबंधन ल ए निःशुल्क अऊ अभूतपूर्व आयोजन बर बधाई दीन अऊ कहिन के राज्य सरकार युवा मन ल आत्मनिर्भर अऊ दक्ष बनाए बर बाना उंचाए हे।
मुख्यमंत्री श्री साय ह कहिन के भिलाई ल इस्पात नगरी के संगे-संग मिनी इंडिया घलो कहे जाथे अऊ शिक्षा के क्षेत्र म रुंगटा विश्वविद्यालय के योगदान सराहनीय हे। मुख्यमंत्री श्री साय ह कहिन के छत्तीसगढ़ ह पाछू 25 बछर म हर क्षेत्र म उल्लेखनीय प्रगति करे हे अऊ ए साल ल हमन राज्य के रजत जयंती के रूप म मनावत हन।
श्री रमन सिंह के कार्यकाल म उच्च शिक्षा संस्थान के विस्तार होइस अउ वर्तमान म राज्य म 15 मेडिकल कॉलेज, आईआईटी, आईआईएम, ट्रिपल आईटी, सिपेट, एम्स, अउ लॉ यूनिवर्सिटी जइसे राष्ट्रीय स्तर के प्रतिष्ठित संस्थान काम करत हवय। उमन कहिन के शिक्षा अउ स्वास्थ्य दुनों क्षेत्र म राज्य सरकार ह समान रूप ले उल्लेखनीय उपलब्धि हासिल करे हे। बीते डेढ़ बछर म सुशासन के स्थापना बर ठोस प्रयास होए हे। शासन ल पारदर्शी बनाए बर अधिकाधिक सेवा ल आनलाइन करे गए हे, जेखर से भ्रष्टाचार उपर प्रभावी नियंत्रण होए हे अऊ राजस्व म उल्लेखनीय बढ़ोतरी होए हे।
मुख्यमंत्री ह कहिन के छत्तीसगढ़ ह खनिज संपदा ले भरपूर प्रदेश ये अऊ एला आत्मनिर्भर बनाए बर हर नागरिक के भागीदारी जरूरी हे। उमन कहिन के प्रधानमंत्री श्री नरेन्द्र मोदी जी ह स्किल इंडिया मिशन के शुरुआत करे रहिन। जब ए मिशन के शुरुआत होइस, भारत दुनिया के 10वीं अर्थव्यवस्था रहिस- अऊ आज, केवल एक दशक म भारत चौथइया स्थान म पहुंच गे हे। मुख्यमंत्री श्री साय ह कहिन के मेगा प्लेसमेंट कैंप के माध्यम ले नियोक्ता अऊ प्रशिक्षित युवा मन के बीच संतुलन स्थापित करे गए हे। ए कार्य डबल इंजन सरकार के प्रतिबद्धता के प्रमाण हे। उमन प्रधानमंत्री इंटर्नशिप योजना ल अब्बड उपयोगी बतात कहिन के ए योजना युवा मन बर अनुभव के संग-संग आर्थिक प्रोत्साहन देवत हे, जेखर से उंखर बर संभावना के नवा द्वार खुलत हे।
मुख्यमंत्री ह जानकारी दीन के राज्य सरकार के नवा औद्योगिक नीति म युवा मन बर विशेष अवसर ठउका करे गए हे। एक हजार ले जादा स्थानीय युवा मन ल रोजगार देहे वाले उद्योग मन ल अनुदान देहे के घलो प्रावधान हे। मुख्यमंत्री श्री साय ह कहिन के नवा रायपुर म हाले म फार्मास्युटिकल कंपनी के शुभारंभ होए हे ये दू कारण ले संभव हो सके हे एक नवा रायपुर ल फार्मा हब के रूप म विकसित करे गए हे अऊ दूसर नवा नीति म फार्मा उद्योग बर विशेष प्रावधान करे गए हे। उमन ह ए घलो बताइन के प्रदेश के पहिली सेमीकंडक्टर यूनिट के आधारशिला हाले म रखे गए हे। एखर पाछू एआई अऊ आईटी क्षेत्र म निवेश बर विशेष अनुदान के योगदान हे।
छत्तीसगढ़ सरकार ह नवा रायपुर म देश के पहिली एआई डाटा सेंटर पार्क घलोक स्थापित करे हे। मुख्यमंत्री ह निजी संस्थान, विशेष रूप ले रंगटा विश्वविद्यालय के सराहना करत कहिन के ये राज्य सरकार के प्रयास म पूरा भागीदार बनके छत्तीसगढ़ ल कौशल हब के रूप म विकसित करत हे। उमन ए ऐतिहासिक उपलब्धि म प्रतिभागी अउ विश्वविद्यालय परिवार ल बधाई दीन।
भिलाई के रुंगटा विश्वविद्यालय म आयोजित विश्व युवा कौशल महोत्सव 2025 के समापन समारोह म छत्तीसगढ़ ल कौशल हब बनाए के दिशा म ऐतिहासिक कदम उठाए गीस। कार्यक्रम म 8183 युवा मन ल आनलाइन माध्यम ले कइ ठन कौशल म प्रशिक्षण देहे गीस। 25 चयनित प्रतिभागी मन ल मुख्यमंत्री श्री विष्णुदेव साय ह प्रशस्ति पत्र देके सम्मानित करिन। ए बेरा म सांसद श्री विजय बघेल अऊ विधायक श्री रिकेश सेन ह घलो कार्यक्रम ल संबोधित करिन अऊ ए ऐतिहासिक आयोजन के सराहना करिन अऊ कहिन के ए पहल युवा मन ल वैश्विक स्तर म प्रतिस्पर्धी बनाए के दिशा म क्रांतिकारी कदम हे।
रूंगटा विश्वविद्यालय के कुलपति श्री संतोष रूंगटा ह स्वागत भाषण म विश्वविद्यालय के गतिविधि मन के जानकारी दीन अऊ कहिन के संस्थान राज्य सरकार के संग मिलके छत्तीसगढ़ ल ग्लोबल स्किल हब बनाए बर सरलग उदीम करत हे। ए बेरा म संयोजक श्री एस.एन. राठौर, आईजी श्री आर. जी. अभिजीत सिंह, रुंगटा विश्वविद्यालय के प्रोफेसर, विषय विशेषज्ञ, प्राध्यापक अऊ भारी संख्या म छात्र-छात्रा मन उपस्थित रहिन।