कौशल ले समृद्धि कोति – युवा मन ल आत्मनिर्भर बनाए म मुख्यमंत्री श्री साय के विशेष जोर

कौशल प्रशिक्षण ल रोजगार ले जोड़व, युवा मन ल बनव आत्मनिर्भर – मुख्यमंत्री श्री साय
रायपुर, मुख्यमंत्री श्री विष्णु देव साय ह आज मंत्रालय महानदी भवन, नवा रायपुर म कौशल विकास विभाग के समीक्षा बैठक म स्पष्ट निर्देश दीन के युवा मन के कौशल प्रशिक्षण ल सीधा रोजगार अऊ स्वरोजगार ले जोड़े जाय। उमन कहिन के सरकार के उद्देश्य केवल प्रशिक्षण देना नइ हे, भलुक युवा मन ल आत्मनिर्भर अऊ सक्षम बनाना हे। एखर बर विभाग कोति ले सरलग नवाचार अऊ प्रभावी कार्ययोजना जरूरी हे।
मुख्यमंत्री ह बैठक म विभागीय योजना मन के प्रगति के समीक्षा करत साल 2025–26 बर जिलेवार प्रशिक्षण उपलब्धि अऊ आबंटित बजट उपर विस्तार ले चर्चा करिन। उमन मुख्यमंत्री कौशल विकास योजना, प्रधानमंत्री कौशल विकास योजना 4.0, अऊ प्रधानमंत्री विश्वकर्मा योजना के अंतर्गत संचालित प्रशिक्षण कार्यक्रम मन के विस्तृत जानकारी लीन।
मुख्यमंत्री ह ‘नियद नेल्ला नार’ योजना के तहत आत्मसमर्पित माओवादी मन ल देहे जात प्रशिक्षण के सम्बन्ध म जानकारी लीन। बैठक म बताए गीस के अब तक 549 युवा मन ल प्रशिक्षण देहे जा चुके हे, जबकि पुनर्वास केंद्र मन म 382 प्रशिक्षणार्थी प्रशिक्षण प्राप्त करत हे। इही क्रम म पीएम जनमन योजना के तहत बहु पिछड़ी जनजाति (PVTG) के युवा मन ल देहे जात कोर्सवार प्रशिक्षण के घलोक समीक्षा करे गीस।
बैठक म विभागीय उपलब्धि मन के जानकारी देवत बताए गीस के 1 जुलाई 2025 ले मुख्यमंत्री कौशल विकास योजना के अंतर्गत चेहरा-आधारित स्कैनिंग प्रणाली ले प्रशिक्षणार्थि मन के उपस्थिति दर्ज करे जात हे, जेखर से पारदर्शिता अऊ निगरानी म सुधार होय हे।
बैठक म विभाग कोति ले निजी संस्था मन के संग करे गए एमओयू के जानकारी घलोक साझा करे गीस, जेमें नांदी फाउंडेशन अऊ महिंद्रा एंड महिंद्रा संस्थान मन ले करे गए समझौता सामिल हे। ए संस्थान मन के माध्यम ले राज्य म गुणवत्ता आधारित प्रशिक्षण संचालित करे जात हे।
बैठक म ‘कौशल तिहार 2025’ के आयोजन के रूपरेखा घलोक प्रस्तुत करे गीस, जेखर उद्देश्य युवा मन म कौशल के प्रति जागरूकता बढ़ाना हे। ये प्रतियोगिता जिला अऊ राज्य स्तरीय दू चरण म आयोजित करे जाही, जेमां दू आयु वर्ग – 22 साल ले कम अऊ 22 साल ले जादा – के प्रतिभागी भाग लेहीं। प्रतियोगिता म 10 प्रमुख ट्रेड ऑटोमोबाइल टेक्नोलॉजी, ब्रिकलेइंग, रिन्युएबल एनर्जी हेल्थ एंड सोशल केयर, प्लंबिंग एंड हीटिंग, इलेक्ट्रिकल इंस्टॉलेशंस, इलेक्ट्रॉनिक्स फील्ड टेक्नीशियन, कंप्यूटर, मोबाइल फोन टेक्नीशियन, ग्राफिक डिजाइन टेक्नोलॉजी/डेस्कटॉप पब्लिशिंग अऊ रेफ्रिजरेशन एंड एयर कंडीशनिंग सामिल हे। जिला स्तर म हर एक ट्रेड अऊ आयु वर्ग ले दू विजेता मन के चयन करे जाही, जेन राज्य स्तरीय प्रतियोगिता म भाग लेहीं। राज्य स्तर के विजेता मन ल पुरस्कार, ट्रॉफी अऊ रोजगार के अवसर देहे जाही। ओ मन ल इंडिया स्किल्स 2025 के क्षेत्रीय अऊ राष्ट्रीय प्रतियोगिता मन बर तैयार करे जाही, जेमां ले चुने गए प्रतिभागी ‘वर्ल्ड स्किल्स 2026’, शंघाई (चीन) म भारत के प्रतिनिधित्व करहीं।
मुख्यमंत्री श्री साय ह कहिन के कौशल विकास योजना मन ले युवा मन के आजीविका, आत्मनिर्भरता अऊ भविष्य के निर्माण ले जोड़े जाना चाही। उमन ए दिशा म सतत प्रयास करे के निर्देश दीन।
बैठक म वन अऊ कौशल विकास मंत्री श्री केदार कश्यप, मुख्य सचिव श्री अमिताभ जैन, मुख्यमंत्री के प्रमुख सचिव श्री सुबोध कुमार सिंह, कौशल विकास विभाग के सचिव श्री एस. भारतीदासन अऊ छत्तीसगढ़ राज्य कौशल विकास अभिकरण (CSDA) के मुख्य कार्यपालन अधिकारी श्री विजय दयाराम के संग आन वरिष्ठ विभागीय अधिकारी उपस्थित रहिन।