कोण्डागांव, 11 सितमबर 2020। जिला म 01 ले 30 सितमबर तक राष्ट्रीय पोषण महिना 2020 के अंतर्गत महिला बाल विकास विभाग कोति ले अलग-अलग स्तर म कई ठन कार्यक्रम संचालित करे जात हे। जेखर अंतर्गत पूरा जिला म राज्य शासन के आदेश के मुताबिक आंगनबाड़ी केन्द्र मन ले 03 ले 06 साल तक के लइका मन अऊ गर्भवती महिला मन बर निःशुल्क तात जवन बांटे के व्यवस्था फेर चालू करे गए हे संगेच कुपोषित लइका, गर्भवती अऊ शिशुवती माता मन ल घर पहुंच पूरक पोषण आहार (रेडी टू ईट पैकेट) देहे जात हे। जेखर से ये आपदा काल म घलोक लइका मन म पोषण के स्तर म कमी झन आवय। एखर संगेच महिला अऊ बालिका मन म स्वास्थ्य संबंधी परेशानी मन ले बचे बर संतुलित आहार अऊ स्वस्थ खान-पान के आदत के विकास बर घर-घर जाके गृहभेंट कार्यक्रम चलाए जात हे।
ये कार्यक्रम म छोटे लइका मन, बालिका मन अऊ गर्भवती महिला मन उपर विशेष ध्यान देहे जात हे संगेच कार्यकर्ता मन ह गृहभेंट करके कोरोना काल म बरते जाय वाले सावधानी मन ले अवगत घलोक करावत हें। लइका अऊ युवा मन ल उज्जवल भविष्य बर सहीं पोषण स्तर के जरूरत ल समझात उंकर मन के स्वस्थ तन म स्वस्थ मन के विकास अऊ स्वस्थ मन ले सबले बढ़िया कार्य क्षमता अऊ उत्पादकता के भावना के प्रसार करना हे। एक अच्छा कार्य क्षमता अऊ उत्पादकता वाले युवा मन के समाज ले ही एक विकसित राष्ट्र के संकल्पना करे जा सकत हे। ए खातिर पोषण महिना म मनखे मन म जागरूकता प्रसार बर कई ठन कार्यक्रम चलाये जात हे।
