छत्तीसगढ़ म शिक्षा, नवाचार अऊ कौशल विकास के नवा युग के शुरुआत – मुख्यमंत्री श्री विष्णु देव साय

रायपुर, मुख्यमंत्री श्री विष्णु देव साय के अगुवई म आज छत्तीसगढ़ म शिक्षा, कौशल विकास अऊ नवाचार के क्षेत्र म एक नवा युग के शुरुआत होइस। मुख्यमंत्री श्री साय आज राजधानी स्थित पं. दीनदयाल उपाध्याय ऑडिटोरियम म आयोजित विशेष कार्यक्रम म छत्तीसगढ़ शासन, भारतीय प्रबंधन संस्थान (आईआईएम) रायपुर, राष्ट्रीय प्रौद्योगिकी संस्थान (एनआईटी) रायपुर अऊ मोतीलाल ओसवाल फाउंडेशन के बीच होए त्रिपक्षीय एमओयू म हस्ताक्षर के साक्षी बनिन। ए समझौता के अंतर्गत स्थापित होवइया उद्यमिता केंद्र के निर्माण साल 2025-26 म चालू होही अऊ एला साल 2027-28 तक पूरा क्रियाशील करे के लक्ष्य निरधारित करे गए हे।
गांव-गांव तक पहुंचही शिक्षा, कौशल अऊ नवाचार के क्रांति: मुख्यमंत्री श्री साय
मुख्यमंत्री श्री विष्णु देव साय ह ए बेरा म कहिन के आज हस्ताक्षरित एमओयू ले “छत्तीसगढ़ अंजोर विजन” ल साकार करे म महत्वपूर्ण सहायता प्राप्त होही। ए साझेदारी ले प्रदेश म गांव-गांव तक शिक्षा, कौशल विकास अऊ नवाचार के क्रांति पहुंचही, जेन युवा मन ल आगू बढ़े बर प्रेरित करही।
मुख्यमंत्री ह कहिन के ए त्रिपक्षीय समझौता के तहत “श्रीमती मिथिलेश अग्रवाल नवाचार अऊ उद्यमिता उत्कृष्टता केंद्र” के स्थापना करे जाही, जेन युवा मन ल शोध, परयोग अऊ उद्यमिता के माध्यम ले आत्मनिर्भर बनाए के काम करही।
उमन ये घलोक कहिन के ये उत्कृष्टता केंद्र केवल आईआईएम या एनआईटी के पढ़ईया लईका मन तक सीमित नइ रहय, बल्कि गांव-गांव के युवा मन ल घलोक लाभान्वित करही। मुख्यमंत्री ह उद्योग जगत ले घलोक ए शिक्षा अऊ कौशल विकास के आंदोलन ले जुड़े के आग्रह करिन।
संसाधन-आधारित न ही, नवाचार-आधारित अर्थव्यवस्था के अगुवई करही छत्तीसगढ़: मुख्यमंत्री श्री साय
मुख्यमंत्री श्री साय ह आगू कहिन के छत्तीसगढ़ अब कोर सेक्टर के संगे-संग सेमीकंडक्टर, आर्टिफिशियल इंटेलिजेंस, फार्मा, डिफेंस, एयरोस्पेस अऊ ग्रीन हाइड्रोजन जइसे अत्याधुनिक क्षेत्र मन म तेज़ी ले अग्रसर होवत हे। बीते 20 महीना म साढ़े तीन सौ ले जादा सुधार मन के परिणामस्वरूप राज्य म निवेश के अनुकूल वातावरण निर्मित होय हे अऊ केवल आठ महिना म 6.75 लाख करोड़ रूपिया ले जादा के निवेश प्रस्ताव प्राप्त होए हे।
मुख्यमंत्री ह प्रदेशवासी मन ले आह्वान करिन के हम सबो ये संकल्प लेवन के छत्तीसगढ़ ल संसाधन-आधारित न ही, बल्कि नवाचार-आधारित अर्थव्यवस्था के अगुवई करइया राज्य बनाबो – जेमां युवा बदलाव के वाहक बनंय अऊ उद्यमिता ले समाज ल दिशा देवंय।
किसान मन बर बनही देश के सबले बड़का प्रशिक्षण केंद्र
मोतीलाल ओसवाल फाउंडेशन के सह-संस्थापक अऊ चेयरमैन श्री रामदेव अग्रवाल ह कार्यक्रम म रायपुर म किसान मन बर देश के सबले बड़े प्रशिक्षण केंद्र स्थापित करे के घोषणा करिन। उमन कहिन के छत्तीसगढ़ एक बहुत समृद्ध प्रदेश हे, जेमां विकास के अपार संभावना हे। उंखर फाउंडेशन ए विकास यात्रा म पूरा समर्पित हे। श्री अग्रवाल ह बताइन के फाउंडेशन ह अपन कुल निधि के 10 प्रतिशत समाज कल्याण बर समर्पित करे के निर्णय लेहे हे, जेखर उपयोग शिक्षा, कौशल अऊ कृषि ले संबंधित काम मन म करे जाही।
मोतीलाल ओसवाल फाउंडेशन के 172 करोड़ रूपिया के योगदान
मोतीलाल ओसवाल फाउंडेशन ह आईआईएम रायपुर अऊ एनआईटी रायपुर ल कुल 172 करोड़ रूपिया के दान देहे के घोषणा करे हे। ये मां ले 101 करोड़ रूपिया आईआईएम रायपुर ल अऊ 71 करोड़ रूपिया एनआईटी रायपुर ल देहे जाही।
ए दानराशि ले आईआईएम रायपुर म “ओसवाल छात्रावास” के 202 कमरा अऊ “दाऊ राम गोपाल अग्रवाल नॉलेज सेंटर” के स्थापना करे जाही। एखर ले अकतहा अमेरिका, ब्रिटेन, फ्रांस अऊ जर्मनी के शीर्ष संस्था मन के सहयोग ले छै अंतरराष्ट्रीय एमबीए कार्यक्रम चालू करे जाही।
अइसनहे, एनआईटी रायपुर म “श्रीमती मिथिलेश अग्रवाल सेंटर ऑफ एक्सीलेंस” के स्थापना करे जाही, जेन आर्टिफिशियल इंटेलिजेंस, रोबोटिक्स, इंटरनेट ऑफ थिंग्स, ब्लॉकचेन अऊ क्लीन एनर्जी जइसे डीप-टेक क्षेत्र मन म काम करही।
ये वाले केंद्र साल 2030 तक 10,000 ले जादा युवा मन ल प्रशिक्षण देही, 250 ले जादा स्टार्टअप्स ल इनक्यूबेट करही अऊ 5,000 ले जादा कुशल नौकरी मन के सृजन करही। ये पहल छत्तीसगढ़ के औद्योगिक जरूरत – विशेषकर खनन, इस्पात अऊ मैन्युफैक्चरिंग क्षेत्र मन – के जइसे विकसित करे गए हे, अऊ ये स्थानीय उद्योग मन के संग मिलके सही समस्या मन के समाधान उपर केंद्रित रइही।
ए बेरा म प्रमुख सचिव श्रीमती निहारिका बारीक, उच्‍च शिक्षा अऊ कौशल विकास विभाग के सचिव श्री एस. भारतीदासन, छत्तीसगढ़ राज्य कौशल विकास प्राधिकरण के मुख्य कार्यपालन अधिकारी श्री विजय दयाराम के, एनआईटी रायपुर के चेयरमैन डॉ. सुरेश हावरे, आईआईएम रायपुर के चेयरमैन श्री पुनीत डालमिया, एनआईटी के निदेशक श्री एन. वी. प्रसन्ना राव, आईआईएम रायपुर के प्रभारी निदेशक डॉ. संजीव पाराशर, प्रशासनिक अधिकारी, शिक्षाविद अऊ बड़ संख्या म छात्र-छात्रा मन उपस्थित रहिन।