कोण्डागांव, 24 मई 2024। छत्तीसगढ़ के कोण्डागांव जिला म पुलिस अऊ सायबर सेल ह अवैध शराब परिवहन के खिलाफ संघरा कार्रवाई करत दू आरोपी मन ल गिरफ्तार करे हे। एखर संगेच पुलिस ह मौका ले कुल 39 पेटी शराब कीमती 263250 रूपिया, कार 4 लाख कीमती, 02 नग मोबाईल, एक पर्स जेमां एक एटीएम कार्ड अऊ कार ल जब्त करे गए हे। पुलिस ले मिले जानकारी के मुताबिक, पुलिस ल मुखबिर ले बिरसपतवार के सूचना मिलीस कि रायपुर ले जगदलपुर कोति एक मारूति सिल्वर कलर कार नंबर से.जी. 07 एल.एम. 6400 म बहुत मात्रा म दारू भरके दू मनखे जावत हें।
मुखबिर ह बताइस कि कार केसकाल ले कुछेक समय म फरसगांव पहुंचइया हे। सूचना मिलतेच पुलिस ह एन.एच 30 फरसगांव पहुंचके नाकेबंदी करिस अऊ सी.जी. 07 एल.एम. 6400 गाड़ी के तलाशी लेहे गीस त वोमे अवैध शराब बरामद करे गीस। उहें कार म बइठे दुनों आरोपी मन के खिलाफ अपराध धारा 34(2) आबकारी एक्ट के तहत कार्रवाई करे गीस। पुलिस के पूछताछ म आरोपी मन ह बताइन कि ओ मन मध्यप्रदेस के बैतूल ले अवैध शराब लाके दन्तेवाड़ा, जगदलपुर क्षेत्र म बेंचथें। आरोपी मन ह अपन पहिचान सविन्दर सिंग (कार चालक), पिता हरबंस सिंग उम्र 27 साल, सुपेला (भिलाई) अऊ दूसर मनखे के नाम रंजित सिंह, पिता अमरपाल सिंह, उम्र 27 साल, सुपेला (भिलाई) बताए हें।