मुख्यमंत्री श्री बघेल ह पुलिस परिवार के समाजसेवी संस्था श्री प्रयास एजुकेशन सोसायटी ल स्वेच्छानुदान मद ले 10 लाख रुपए के सहायता करिन

रायपुर, मुख्यमंत्री श्री भूपेश बघेल ह पुलिस परिवार कोति ले संचालित समाजसेवी संस्था श्री प्रयास एजुकेशन सोसायटी ल स्वेच्छानुदान मद ले 10 लाख रुपए के अनुदान राशि देहे हें। ये संस्था गरीब, मजदूर परिवार के लइका मन ल कक्षा चौंथी ले कॉलेज तक निःशुल्क शिक्षा प्रदान करथे। संस्था कोति ले लइका मन ल प्रतियोगी परीक्षा बर निःशुल्क कोचिंग घलोक देहे जाथे। मुख्यमंत्री श्री बघेल के तरफ ले 10 लाख रुपए के स्वेच्छानुदान राशि के चेक जनप्रतिनिधि श्री सुशील ओझा ह श्री प्रयास एजुकेशन सोसायटी के शिक्षक अऊ लइका मन ल सौंपिन।
ये संस्था रायपुर के मठपुरैना स्थित आदिवासी नागरची गोंडवाना समाज के भवन म 14 मई 2018 ले संचालित हे। अभी हाल म ये संस्था म 700 लइका पढ़त हें, जिहां 15 शिक्षक-शिक्षिका मन अध्यापन के काम निःशुल्क करत हें। लइका मन ल कम्प्यूटर, प्रोजेक्टर के माध्यम ले शिक्षा देहे जाथे। संस्था म सुसज्जित प्रयोगशाला घलोक हे। इहां योगा क्लास भिनसरहा 5.30 ले 6.30 बजे तक संचालित होथे, ओखर बाद दू पारी म भिनसरहा 6.30 बजे ले 9.30 बजे अऊ संझा 5 बजे ले 7.30 बजे तक क्लास लगथे। संस्था म सीबीएससी अऊ छत्तीसगढ़ माध्यमिक शिक्षा मण्डल के पाठ्यक्रम संचालित हे। ये बेरा म संस्था के शिक्षक-शिक्षिका अऊ छात्र उपस्थित रहिन।