छत्तीसगढ़ म ग्रामीण अर्थव्यवस्था के विकास के संग महिला मन बर खुलिस नवा रद्दा: श्रीमती भेंड़िया

रायपुर, 28 जून 2021। राज्य सरकार महिला मन के सुरक्षा, संरक्षण अऊ सम्मान बर कृतसंकल्पित हे। मुख्यमंत्री श्री भूपेश बघेल के पहल म छत्तीसगढ़ म ग्रामीण अर्थव्यवस्था के विकास ले महिला मन ल जोड़त उंखर उन्नति बर नवा रद्दा खोले गए हे। महिला मन ल गौठान, वनोपज संग्रहण, प्रसंस्करण संग कई ठन आजीविका मूलक गतिविधि मन ले जोड़े गए हे एखर से महिला मन म आत्मविश्वास बाढ़े हे। धमतरी म महिला समूह मन कोति ले दीया बनाए के काम होवत हे, जेला बाहिर ले घलोक ऑर्डर मिले लगे हे। दंतेवाड़ा म डेनेक्स गॉरमेंण्ट फैक्ट्री के संचालन महिला मन करत हें अऊ रेडिमेड कपड़ा बनाके बाहिर भेजत हें। ये आदिवासी नारी मन ल सशक्त बनाए के एक बढ़िया उदाहरण हे। महिला अउर बाल विकास अऊ समाज कल्याण मंत्री श्रीमती अनिला भेंड़िया ह आज दुर्ग म हेमचन्द यादव विश्वविद्यालय कोति ले आयोजित ऑनलाईन वेबीनार म छत्तीसगढ़ के संदर्भ म नारी सशक्तिकरण विसय म अपन विचार व्यक्त करत ये बात कहिन।