माटी बांध ले बाढ़िस किसान मन के कमई, सिंचई अउ रोजगार

CHHATTISGARHI NEWS: सूरजपुर, मुख्यमंत्री श्री विष्णु देव साय के अगुवई म छत्तीसगढ़ सरकार ग्रामीण अर्थव्यवस्था ला मजबूत करे अउ जल संरक्षण ला बढ़ावा देहे खातिर काम करत हे। विकसित भारत जी-राम-जी योजना के तहत सूरजपुर जिला के ओड़गी विकासखंड के ग्राम पंचायत कालामांजन म बने माटी बांध ए उदीम के सफल उदाहरण बन के आगू आए हे।
ए बांध ले गांव म पानी के संरक्षण के संग किसान मन ला सिंचाई, रोजगार अउ उपरहा कमई के सुविधा मिलत हे। गांव के किसान श्री सुखनंदन सिंह पहिली सिरिफ परंपरागत धान खेती ऊपर निर्भर रहिस। बांध बने के बाद वो ह मछली पालन शुरू करिस, जेकर से अब वोला हर साल करीब 50 हजार ले 1 लाख रुपिया तक उपरहा आमदनी होवत हे।
शासन कोति ले ओला साल म दू किस्त म तीन-तीन हजार रुपिया के आर्थिक सहायता देहे जाथे। संग म मछरी बीज, जाल अउ जरूरी समान घलो उपलब्ध कराए गे हे। मछली पालन ले होवत उपरहा कमई के उपयोग वो अपन बच्चा मन के पढ़ई अउ खेती बर खाद, बीज सहित जरूरी सामान खरीदे म करत हवय।
माटी बांध के फायदा सिरिफ एक परिवार तक सीमित नइ हे। आसपास के कई किसान बांध म जमा पानी ले धान सहित दूसर फसल के सिंचाई करत हवंय। एकर से खेत म नमी बने रहिथे, सिंचाई के सुविधा बाढ़े हे अउ कृषि उत्पादन म सुधार होए हे।
बांध निर्माण के समय गांव के कई श्रमिक मन ला अपन गांव म ही रोजगार मिले हे। एकर से रोजगार के अवसर बाढ़े के संग पलायन कम करे म मदद मिले हे अउ ग्रामीण अर्थव्यवस्था ला मजबूती मिले हे।