धरमपुरा GG Digital News Desk, खेती-किसानी म माटी के सेहत सबले जादा जरूरी होथे। कहूं माटी कमजोर होही, त फसल कइसे अच्छा होही? इही बात ल समझाए बर विश्व मृदा दिवस (World Soil Day) के मौका म रायपुर कृषि महाविद्यालय के टीम धरमपुरा के नकटी गाँव पहुचिस। इहाँ ‘स्वस्थ शहर बर स्वस्थ माटी’ के नारा के संग एक बड़े जागरूकता कार्यक्रम होइस।
खेत म होइस माटी के जाँच
डॉ.गौरव कुमार अउ डॉ. विवेक कुमार ह किसान मन ल ‘मिट्टी टेस्टिंग किट’ ले माटी जाँच करे के तरीका बताइन। ओमन सिखाइन के खेत ले माटी कइसे लेना हे अउ ओखर जाँच कइसे करना हे। वैज्ञानिक मन बताइन के माटी के जाँच कराए ले पता चलथे के ओमा कतिक खाद के जरूरत हे। किसान मन ल ये जानकारी बहुत काम के लागिस अउ ओमन एला अपनाए के बात कहिन।
लइका मन जीतिन इनाम
कार्यक्रम म स्कूल अउ कॉलेज के छात्र-छात्रा मन बर रंगोली, पोस्टर अउ भाषण प्रतियोगिता घलो रखे गे रिहिस।
रंगोली: जानकी साफा ह पहली नंबर म आइन।
पोस्टर: उन्नति शेष, हर्षिता अउ दीक्षा ह मिलके बाजी मारिन।
भाषण: पूर्णेन्द्र कुमार वर्मा ह सबले बढ़िया भाषण दिस।
का कहिन एक्सपर्ट?
डॉ. राकेश बनवासी अउ डॉ. आलोक तिवारी ह किसान मन ल समझाइन के रसायनिक खाद के कम उपयोग करना चाही अउ जैविक खेती डहर ध्यान देना चाही। कॉलेज के डीन डॉ. आरती गुहे ह कहिन के अब खेती म वैज्ञानिक तरीका अपनाए के समय आ गे हे, तभे किसान के तरक्की होही। कार्यक्रम के आखिरी म डॉ. एल.के. श्रीवास्तव ह माटी दिवस के महत्व ल सब ल समझाइन।
