प्रधानमंत्री सूर्य घर मुफ्त बिजली योजना ला मिलही नवा बल, ग्रामीण इलाका मन म खुलही रोजगार के मौका
राष्ट्रीय ग्रामीण आजीविका मिशन (बिहान) के अनूठा पहल, अब महिला मन खुद करहीं सौर उपकरण मन के मरम्मत अउ स्थापना
कबीरधाम, छत्तीसगढ़ के कबीरधाम जिला म ग्रामीण महिला मन ला तकनीकी रूप ले मजबूत अउ आर्थिक रूप ले आत्मनिर्भर बनाय बर एक सराहनीय अउ नवा सुरुआत करे गे हे। राष्ट्रीय ग्रामीण आजीविका मिशन (बिहान) के तहत वंदे मातरम् संकुल स्तरीय संघ ले जुड़े 35 महिला स्व-सहायता समूह के सदस्य मन ला “सोलर दीदी” के रूप म बिसेस तकनीकी प्रशिक्षण दे गे हे। ये प्रशिक्षण के बाद अब ये महिला मन गाँव-गाँव म सौर ऊर्जा संयंत्र अउ उपकरण मन ला लगाय (इंस्टॉलेशन), चलाए तथा ओकर देख-रेख अउ मरम्मत के मोर्चा सँभालहीं।
विशेषज्ञ मन ह सिखाइन तकनीकी गुर अउ ब्यवहारिक तरीका
आयोजित प्रशिक्षण कार्यक्रम म तकनीकी विशेषज्ञ मन कोति ले महिला मन ला सोलर सिस्टम के बारीकी मन के जानकारी देहे गीस। प्रशिक्षण के बखत मुख्य रूप ले सोलर पैनल अउ सिस्टम के तकनीकी जानकारी, इंस्टॉलेशन (स्थापना) के सही तरीका, सौर उपकरण मन के सरलग देख-रेख, खराबी आय ऊपर समस्या ला दूर करे के ब्यवहारिक तौर-तरीका मन ला बताय गीस। ये पहल ले सुदूर ग्रामीण इलाका मन म सौर ऊर्जा सेवा मन के स्थानीय स्तर ऊपर उपलब्धता तय होही। अब ग्रामीण मन ला अपन सौर उपकरण मन ला सुधरवाय बर सहर के चक्कर नइ काटे बर परही, भलुक ओकर अपन च गाँव म तुरंते तकनीकी सहायता मिल सकही।
प्रधानमंत्री सूर्य घर मुफ्त बिजली योजना ला मिलही गति
यह अभियान केंद्र सरकार के महत्वाकांक्षी प्रधानमंत्री सूर्य घर मुफ्त बिजली योजना ला सही ढंग से लागू करे म मील के पत्थर साबित होही। ये सोलर दीदी मन गांव के घर मन अउ स्थानीय संस्थान मन म सौर ऊर्जा संयंत्र लगाय म सीधा सहयोग करहीं। एकर ले जिहाँ एक कोति ग्रामीण इलाका मन म साफ-सुथरा अउ हरित ऊर्जा के तेजी ले बिस्तार होही, उहें सौर संयंत्र मन के स्थापना ले मिलइया कमीशन अउ तकनीकी सर्विस चार्ज के माध्यम ले ये महिला मन के आय (कमाई) म घलो बड़े बढ़ोतरी होही।
महिला सशक्तिकरण अउ सतत बिकास के सबले अच्छा मॉडल
जिला पंचायत कबीरधाम के मुख्य कार्यपालन अधिकारी श्री अभिषेक अग्रवाल ह ये पहल ल सहराव कहिन के यह कार्यक्रम ग्रामीण महिला मन के सशक्तिकरण के दिसा म एक बहुत महत्वपूर्ण अउ नवा कदम हे। सोलर दीदी कार्यक्रम ह महिला मन ला पुरूस प्रधान वाले तकनीकी क्षेत्र म एक नवा पहिचान देवाय के संगे-संग ओमन ला आर्थिक रूप ले पूरा आत्मनिर्भर बने के एक बड़े मौका देवत हे।
सोलर दीदी मन गाँव मन ला ऊर्जा के क्षेत्र म बनाहीं आत्मनिर्भर
ये अनूठा परियोजना महिला सशक्तिकरण, पर्यावरण के सुरक्षा (हरित ऊर्जा संवर्धन) अउ सतत बिकास के लक्ष्य मन ला एक संग पाये के एक बहुत बढ़िया उदाहरन पेस करत हे। अवइया बेरा म ये सोलर दीदी मन न सिरिफ कबीरधाम के गाँव मन ला ऊर्जा के क्षेत्र म आत्मनिर्भर बनाहीं, भलुक समाज के दूसर महिला मन बर घलो प्रेरणा के एक बड़े स्रोत बनहीं।
