प्रधानमंत्री सूर्यघर योजना ले बिजली बिल के बोझा होइस कम
बलरामपुर-रामानुजगंज, छत्तीसगढ़ म प्रधानमंत्री सूर्यघर योजना मनखे मन खातिर ऊर्जा आत्मनिर्भरता के सशक्त माध्यम बनत हे। ए योजना के तहत घर के छत म सब्सिडी म सोलर पैनल लगाए जात हे, जेखर से मासिक बिजली बिल म भारी कमी आवत हे संगेच मनखे मन खातिर अकतहा बिजली बेंच के कमई के रद्दा घलोक खुलत हे।
बलरामपुर-रामानुजगंज जिला के श्री रोहित गुप्ता ह ए योजना के लाभ लेके 3 किलोवाट क्षमता के सोलर प्लांट अपन घर म स्थापित करे हे। केंद्र सरकार ले 78 हजार अऊ राज्य सरकार ले 30 हजार रूपिया के सब्सिडी मिले ले ये व्यवस्था वोखर बर किफायती साबित हो गे। श्री गुप्ता ह बताइस के अब ओखर बिजली बिल लगभग खतम हो गए हे अऊ जल्दीच ओ ह अकतहा बिजली ल विभाग ल बेचके आय अर्जित करे के तैयारी करत हे।
शासन कोति ले चलाए जात जागरूकता कार्यक्रम के सेती प्रदेश के शहरी अऊ ग्रामीण दुनों क्षेत्र मन म मनखे तेजी ले ए योजना ले जुड़त हें। अब तक हजारों घर मन म सोलर सिसटम लगाए जात हे, जेखर से बिजली बचत के संग पर्यावरण संरक्षण म घलोक योगदान मिलत हे।
सौर ऊर्जा बनिस आत्मनिर्भरता के चिन्हारी
