पीएम सुरुज घर-मुफ्त बिजली योजना ले मिलत हे बिजली बिल ले राहत
अम्बिकापुर, प्रधानमंत्री सुरुज घर-मुफ्त बिजली योजना ह आम उपभोक्ता मन ल बिजली बिल के चिंता ले मुक्त कर देहे हे, संगें-संग ओ मन ल “बिजली उत्पादक” बनाए के अवसर घलोक देहे हे। ए योजना के लाभ उठाके सरगुजा जिला के गंगापुर रहवइया श्री अशोक कुमार ह अपन घर के छत म 5 किलोवाट क्षमता के सोलर रूफटॉप प्लांट स्थापित करे हे।
एक लाख 8 हजार के मिलत हे सब्सिडी
श्री कुमार ह बताइस के सामान्य दिन म ये संयंत्र रोजेच 21 यूनिट तक बिजली के उत्पादन करत हे, जबकि बादल के मौसम म घलोक 15 यूनिट ले जादा बिजली देथे। वो ह बताइस के ए योजना के तहत केंद्र सरकार कोति ले 78 हजार रुपिया अऊ राज्य सरकार कोति ले 30 हजार रुपिया, कुल मिलाके 1 लाख 8 हजार रुपिया के सब्सिडी मिलत हे। ग्रामीण बैंक ले वित्तीय सहयोग लेके लगाए गे ए संयंत्र ले ओखर बिजली बिल माइनस हो गए हे। वो ह खुशी जाहिर करत कहिस के सोलर रूफटॉप ले बिजली बिल ले छुटकारा मिले हे, संगेच ग्रीन एनर्जी ल घलोक बढ़ावा मिलत हे। अकतहा बिजली ल हम ग्रिड ल बेच सकत हन। ये योजना सही म जनता बर राहतकारी हे। वो ह मनखे मन ले अपील करे हे के ओ मन आगू आके ए योजना के लाभ उठावंय अऊ बिजली बिल के चिंता ले मुक्त होके स्वच्छ ऊर्जा कोति कदम बढ़ावंय।
ऑनलाईन प्रक्रिया ले पीएम सुरुज घर-मुफ्त बिजली योजना बर कर सकत हें आवेदन
पीएम सुरुज घर मुफ्त बिजली योजना के लाभ लेहे के बर उपभोक्ता मन ल कोनो जटिल प्रक्रिया ले नइ गुजरना परय। पूरा आवेदन अऊ स्थापना के प्रक्रिया ऑनलाइन माध्यम ले घलोक संभव हे। उपभोक्ता स्वयं पोर्टल म लॉगिन करके आवेदन कर सकत हे। वेंडर के चयन घलोक उपभोक्ता खुद ऑनलाइन कर सकत हे। आवेदन बर पीएम सुरुज घर मोबाइल ऐप, सीएसपीडीसीएल के वेबसाइट, मोर बिजली ऐप या बिजली कंपनी के टोल फ्री नंबर 1912 म कॉल के सुविधा घलोक उपलब्ध हे। जादा जानकारी बर उपभोक्ता नजदीकी सीएसपीडीसीएल कार्यालय ले घलोक संपर्क कर सकत हे
हरित ऊर्जा ले समृद्ध होही भविष्य
पीएम सुरुज घर-मुफ्त बिजली योजना ले एक कोति आम नागरिक मन ल आर्थिक लाभ होवत हे, उहें दुसर कोति स्वच्छ ऊर्जा के उपयोग ले हरित भविष्य के रद्दा घलोक प्रशस्त होवत हे। ये योजना गांव-गांव अऊ शहर-शहर म ऊर्जा आत्मनिर्भरता के दिशा म महत्वपूर्ण कदम साबित होवत हे।
