रबी अउ गर्मी म साग-सब्जी उत्पादन ले भरतसिंह ल मिलीस अकतहा आय के जरिया
बीजापुर, दिनांक 24 जून 2020। राज्य शासन कोति ले किसान मन के आय म बढ़ोतरी बर संचालित सौर सुजला योजना ग्रामीण ईलाका मन के किसान मन बर बहुत उपयोगी साबित होवत हे। सौर सुजला योजना के अंतरगत सोलर सिंचाई पंप स्थापना ले खेती-किसानी ल प्रोत्साहन मिलत हे, उहें पेयजल बर शुद्ध पानी घलोक मिलत हे। बीजापुर अंतर्गत ग्राम मांझीगुडा़ निवासी बुजुर्ग किसान श्री भरतसिंह बेलगंया सोलर सिंचाई पंप के जरिये रबी अऊ ग्रीष्मकाल के समय अपन डेढ़ एकड़ बाड़ी म साग-सब्जी उत्पादन करके अकतहा आय प्राप्त करत हे। वोकर बताती वो ह अपन खुद के पइसा ले नलकूप म खोदवाए रहिस। साल 2016-17 म उद्यानिकी अउ क्रेडा के मदद ले वो ह वोमा सोलर सिंचाई पंप स्थापित करिस। येकर बर वो ह 10 हजार रूपिया कृषक अंशदान जमा करिस, अउ छत्तीसगढ़ अक्षय ऊर्जा विकास अभिकरण कोति ले 2 लाख 30 हजार रूपिया के अनुदान देहे गीस । किसान श्री भरतसिंह ह बताइस के ये सोलर सिंचाई पंप ले ओ अपन डेढ़ एकड़ बाड़ी म रबी सीजन के समय बैंगन, भिंडी, करेला, बरबट्टी, टमाटर, मिर्च ईत्यादि साग-सब्जी उत्पातिद करत हे। ग्रीष्मकाल म लौकी, कद्दू, भिंडी, बरबट्टी, करेला मेथी धनिया आदि उत्पादन करत हे। उत्पादित साग-सब्जी ल समीपस्थ बीजापुर नगर म हर महीना तीन ले चार हजार रूपिया के विक्रय करत हे। ये अकतहा आमदनी ले ओ ल घर-परिवार के जरूरत ल पूरा करे म मदद मिलत हे।
अनुसूचित जनजाति वर्ग के सामान्य कृषक श्री भरत सिंह ह बताइस के वोकर पास कुल 6 एकड़ कृषि जमीन हे, जेमां ले 2 एकड़ खेत म सफरी-चुड़ी जइसे देशी किसिम के धान के फसल लेथें। 2 एकड़ रकबा म एचएमटी धान के श्रीविधि ले रोपा लगाथे अऊ दो एकड़ मरहान जमीन म उड़द कुल्थी जइसे स्थानीय दलहन के खेती करथे। अपन ये खेती-किसानी के आय ले वो ह 14 सदस्यीय परिवार के आसानी के संग भरण-पोषण करत हे। एखर संगेच घर म खेती-किसानी काम बर एक ट्रेक्टर रखे हे, जऊन ल किराया म घलव चलाथे।
