कोरिया: सोलर सिंचाई पम्प ले खेत म छाइस हरियाली, आसान होइस सिंचाई

कोरिया, सौर सुजला योजना ले आज जिला के दुर्गम क्षेत्र मन तक घलोक किसान मन के खेत मन म फसल लहलहावत हे। जिला म छत्तीसगढ़ अक्षय ऊर्जा विकास अभिकरण (क्रेडा) विभाग कोति ले मिले सोलर पम्प मन ले सिंचाई आसान हो गए हे। विभाग कोति ले मिले जानकारी के मुताबिक जिला म अब तक 6 फेस म कुल 2,432 सोलर सिंचाई पम्प लगाए गए हे।
विकासखण्ड सोनहत के ग्राम सलगवां के किसान सुखराज के बताती वोखर तिर डेढ़ एकड़ खेती के जमीन हे, पहिली ओ ह सीजनेच म मक्का, सरसों जइसे फसल लगावत रहिस,काबर के नल अऊ वर्षाजल के माध्यम ले भरपूर सिंचाई नइ हो पात रहिस, फेर साल 2020 म 3 एचपी के सोलर पम्प लग जाय ले अब पूरा साल खेत मन म हरियाली रहिथे, जेखर से ओ ह अड़बड़ खुश हे। अइसनहे 1.97 एकड़ म धान, गेंहू, चना अऊ सब्जी के खेती करत ग्राम कैलाशपुर के रामकुमार बताथे कि सोलर पम्प लगे ले पहिली खेत मन म सिरिफ धान ही लगा पात रहेन, अब खेती ले लाभ घलोक बने होवत हे। अइसनहे गांव के ही किसान इंद्रपाल सोलर पम्प ले सिंचाई म होए लाभ ल बतात कहिथें कि पहिली पानी के कमी के सेती पूरा खेत म साग भाजी लगाना मुश्किल रहिस, फेर अब पूरा 1.5 एकड़ म साग भाजी लगे हे, जेखर से पूरा परिवार अड़बड़ खुश हे।