सौर सुजला योजना ले किसान मन ल राहत

सिंचाई बनिस आसान, दोहरी फसल ले बाढि़स कमई
बलरामपुर, जिला म सौर सुजला योजना किसान मन बर वरदान साबित होवत हे। वर्षा म निर्भर रहइया किसान मन ल अब सिंचाई के चिंता नइ हे, काबर के ए योजना के अंतर्गत ओ मन ल सोलर पम्प के सुविधा मिलत हे। एखर से न केवल सिंचाई आसान हो गए हे, बल्कि किसान अब खरीफ अऊ रबी दुनों मौसम म फसल उत्पादन करके जादा आय अर्जित करत हें। जिला म ए योजना के प्रभावी क्रियान्वयन होवत हे। किसान न केवल धान के खेती करत हे, बल्कि साग-भाजी के उत्पादन करके अकतहा आमदनी प्राप्त करत हे।
बलरामपुर जिला के ग्राम साहपुर रहवइया विनय खलखो ह बताइस के वो ह 1.5 एकड़ जमीन म सोलर पम्प लगवाके धान अऊ साग-सब्जी के खेती शुरू करे हे। अब ओ ह दुहरी फसल लेके जादा लाभ कमावत हे। अइसनहे ग्राम दोहना के किसान श्रीमती तैनू पैंकरा ह बताइस के पहिली रबी के फसल लेना कठिन रहिस, फेर अब सोलर पम्प लगे ले बिजली के समस्या अऊ बिल के चिंता नइ रहिस। ओ ह खरीफ अऊ रबी दुनों फसल के उत्पादन करत हे, जेखर से वोखर आय म उल्लेखनीय बढ़ोतरी होए हे।
ग्राम भनौरा के किसान कृष्णा सिंह ह 3 एचपी क्षमता के सोलर पम्प लगवाए हे। अब ओ ह मौसम मुताबिक धान के संग साग-सब्जी घलोक उपजावत हे, जेखर से ओ ल अकतहा आमदनी होवत हे। पहिली वर्षा आधारित खेती ले सीमित उत्पादन होत रहिस, फेर अब किसान पूरा साल खेती करे म सक्षम होवत हे। जिला म चालू साल बर 290 सोलर पम्प स्थापना के लक्ष्य निरधारित करे गए हे। इच्छुक किसान आधार कार्ड, खसरा नक्शा, जाति प्रमाण पत्र, पासबुक के छायाप्रति अऊ आवेदन शुल्क के संग अपन नजदीकी कृषि विस्तार अधिकारी, क्रेडा कार्यालय या उप संचालक कृषि कार्यालय म संपर्क करके योजना के लाभ उठा सकत हे। सौर सुजला योजना ले किसान मन ल बिजली बिल ले राहत मिले हे अऊ ओ मन निर्बाध सिंचाई कर पात हें। एखर से उंखर खेती म निर्भरता अऊ आमदनी दुनों म बढ़ोतरी होए हे, जेन प्रदेश के ग्रामीण अर्थव्यवस्था ल सशक्त बनावत हे।