सोमवारी: हम का जानी साहेब

दूएच दिन पहिली हमर हांका म समाचार छपे रिहिसे कि छत्तीसगढ़ माध्यमिक शिक्षा मंडल रइपुर के सचिव ह ये स्पष्ट करीन हे कि 12 वीं बोर्ड परीक्षा स्थगित करे के संबंध म कोनो किसम के हुकुम मंडल कोति ले जारी नइ करे गे हे, ये हुकुम ह झूठा अउ गलत हें। एकर ले कोनो भरम म झन परय।
जानबा होवय कि कोनो लबरा मन ह अइसन किसम के फोकटइहा अउ गलत आदेश बगरा देहे रिहिने। छत्तीसगड़ राज्य फेक न्यूज कंट्रोल अउ स्पेशल मानीटरिंग सेल ह ये बगरे खभर ल झूठा घोषित करीन हे तेकर पीछू छत्तीसगढ़ माध्यमिक शिक्षा मंडल कोति ले ये स्पष्टीकरन प्रकासित करे बर परिस हे।
अभीच -अभीन के बात हरे। व्हाट्सअप म एक ठिन संदेशा आइस। जेमा लिखे गे हवय कि ये ह सूरदास के भजन हरे। अबड़ बछर पहिली लिखेे भजन ह आज सही होवत हे।
जेकर अरथ अइसन हे:- संवत दू हजार के उप्पर म अइसे योग परही कि उत्ती- बूड़ती -रक्सहूं -भंडार सबो दिशा म अकाल मृत्यु होए लगही। ये काल के गाल ले उहीं बांचही जउन हंस के धियान धरही।
सन् 2020-2021 के संबंध म कतकोन अकन बैज्ञानिक अउ गुनी – गियानी मन ह अपन -अपन मत के हिसाब म आनी -बानी के भविसबानी करे हे। ये बेरा ल देखत कोनो दू मत के बात तको नइहे के एला नइ पतियाबोन।
अब गुने वाले गोठ ये हे साहेब के ये किताब अउ येमा लिखाए भजन उपर कतेक अकन भरोसा करीन।
भरोसा तो 12वीं बोर्ड परीक्षा मन के स्थगित होए के समाचार म तको होगे रिहिसे।
अब हमर दिमाक के झोला अइसे हे कि सही – लबारी कुछू भी गोठ होवय समा जथे। हमार संग इहीच दिक्कत हे कि हम हरेक बात के मतलब समझ जथन फेर मतलब के बात ल नइ समझ पावन।
धर्मेन्द्र निर्मल