कहिन लॉक डाउन म फंसे गरीब अऊ जरूरतमंद करहीं उपयोग त माँ के आत्मा ल मिलही शांति
रायपुर, 27 अप्रैल 2020। कहिथें के दान ले बड़का कोनो पुण्य नइ होवय, खास मौका म दान के महत्व अऊ बाढ़ जाथे। अइसनहे मौका काल अकती के रहिस। देवेंद्र नगर म रहइया नवीन पाठक के माँ स्वर्गीय श्रीमती प्रतिमा पाठक के आज बरसी रहिस। बेटा ल सुरता हे के जब मां जीयत रहिस तब आजे के दिन वो अपन हाथ ले अन्न, जल संग आन चीज मन के दान करत रहिस। अपन माँ के ये परंपरा ल बेटा ह घलोक जारी रखे हे।
अभी लॉक डाउन हे अइसन म अभी हाल म बहुत अकन गरीब, बेसहारा अउ फसे मनखे हें जे मन राहत कैम्प म हें अऊ जिमन ल सहायता के सख्त जरूरत हे, उंकर ये कठिनाई के बात वो बेटा के मन म आईस। तेकर बाद वो ह रायपुर जिला म कलेक्टर के पहल म संचालित डोनेशन ऑन व्हील्स ल फोंन करिस। अउ अपन माँ के बरसी ल यादगार बनाए अऊ उंखर आत्मा ल सुकून देहे बर डोनेशन ऑन व्हील्स ल घर बला के अपन पत्नी श्रीमती विनिता पाठक के संग मिलके 210 किलो आटा दान करिस। पाठक परिवार के ये सहयोग ल कलेक्टर डॉ एस भारतीदासन अऊ आन अधिकारी मन ह खूब सहराइन।
