सोनाक्षी के साहस अउ चिरायु योजना ह बदल दिस ज़िंदगी

महासमुंद, जिला के ग्राम कुल्हरिया म रहइया 12 बछर के सोनाक्षी एक साधारण अउ गरीब परिवार ले हवय। ओखर ददा श्री किसन लाल दीवान ह मिहनत-मजूरी करके परिवार के पालन-पोषण करथे। सोनाक्षी सासकीय पूर्व माध्यमिक साला पथर्री म सातवीं कक्षा के पढ़इया नोनी आय अउ दूसर लइका मन के बरोबर ओहू अपन भविस्‍य ला लेके बड़का सपना देखय। फेर नानपन ले ही ओखर कमजोर सेहत ओखर सपना के रद्दा म बाधा बनत रहिस।
जब सोनाक्षी पांचवीं म पढ़त रहिस, तब इसकूल म होए चिरायु स्वास्थ्य जांच के बखत ओखर म हिरदे रोग के लच्छन मिलिस। ओला अक्सर सांस फूलय, वो ह जल्दी थक जाय, गोड़ मन म सूजन, दिल के धड़कन के अनियत होना अउ घेरी-बेरी सर्दी-खांसी के समस्या रहय। चिरायु टीम के आयुष डाक्टर मन कोती ले परिवार वाले मन ला एकर जानकारी दे गीस अउ मुफ्त इलाज के बारे म समझाय गीस। हालांकि सोनाक्षी ह देखे म सुग्घर दिखत रहिस, एकर सेती सुरू म परिवार ह एला गंभीरता ले नई लिस। साला के प्रधान पाठक श्री मोहन लाल साहू अउ चिरायु टीम के सदस्य मन ह सरलग परिवार ला जागरूक करिन। फार्मासिस्ट धनेश्वर दीवान अउ एएनएम श्रीमती विशाखा साहू ह बखत-बखत म सोनाक्षी के हालत म नजर रखिन अउ ओखर दाई-ददा ला इलाज बर तइयार करिन। धीरे-धीरे सोनाक्षी ह खुद हिम्मत देखाइस अउ अपन दाई-ददा ला दिल के जांच बर राजी करिस।
चिरायु टीम के मदद ले सोनाक्षी ला रायपुर के एम एम आई नारायणा अस्पताल ले जाय गीस, जिहां बड़े डाक्टर मन कोती ले ओखर पूरा जांच करीन। जांच म पता चलिस के ओखर दिल म 24 × 19 मिमी के छेद हवय, जेखर से ओखर जान ला खतरा रहिस। डाक्टर मन परिवार ला एकर गंभीरता ला समझाइन अउ जल्दी आपरेशन कराय के सलाह दीन। परिवार बर ए बखत बहुते कठिन रहिस, फेर चिरायु योजना ह ओमन ला एक आस दिस। योजना के तहत सोनाक्षी के आपरेशन पूरा तरीका ले मुफ्त म करे गीस। जानकार डाक्टर मन के टीम ह सफलता के संग आपरेशन करके ओखर दिल के छेद ला ठीक कर दीन। ए आपरेशन ह सोनाक्षी बर एक नवा जनम बरोबर रहिस।
आज सोनाक्षी पूरा तरीका ले चंगा हवय। ओखर चेहरा म फेर अंजोरी लहुट आये हवय अउ ओ ह अब पहिली ले जादा भरोसा के संग इसकूल जाथे। सही बखत म लेहे गे सही फैसला अउ सरकारी योजना मन के लाभ कोनो के जिंदगी ला बदल सकथे। इसकूल म होय चिरायु स्वास्थ्य जांच ह एक बड़े बीमारी ला बखत रहत चिन्‍ह लिस, जेकर ले सोनाक्षी ला नवा जिंदगी मिलिस अउ संग म दूसर लइका अउ सियान मन म घलो स्वास्थ्य ला लेके जागरूकता बाढिस। सोनाक्षी अउ ओखर परिवार आज पूरा मन ले चिरायु योजना अउ ओकर ले जुड़े सबो अधिकारी-करमचारी मन के आभार मानथे, जेमन एक मासूम नोनी ला फिर ले मुस्कुराय के मउका दीन।