डैनेक्स ह बदलिस कटेकल्याण म सैकड़ों महिला मन के जिंदगी
छत्तीसगढ़ म आर्थिक स्वावलंबन के इतिहास रचत हें ग्रामीण महिला मन
दंतेवाड़ा, जिला के कटेकल्याण गांव कभू छत्तीसगढ़ के बहुतेच संवेदनशील क्षेत्र माने जात रहिस। जनवरी 2022 म कटेकल्याण गांव म दंतेवाड़ा नेक्स्ट मने डेनेक्स नाम के फैक्टरी स्थापित होए के बाद इहां सब कुछ बदल गए हे। कटेकल्याण ले 10 किमी दूरिहा रहइया सोनम मरकाम अपन दू साल के लइका के संग संयुक्त परिवार म रहिथे। सोनम के परिवार म कुल छै सदस्य हे फेर कमाने वाला सिरिफ एक सोनम के पति ही रहिस। सोनम के सिलाई के शौक रहिस, फेर ओखर शौक ल पूरा करे बर कोनो साधन नइ रहिस, अइसन म डेनेक्स सोनम बर उम्मीद के अइसन किरण बनके आइस कि जेखर से अब सोनम अपन पति के आगू हाथ फैलावय नहीं भलुक पति के हाथ म कुछ देथे।
डेनेक्स म काम करे बर सोनम रोजाना 10 किमी दूरिहा ले बस म बइठके आथे अऊ वापस जाथे। आज सोनम हर महीना 7 हजार रूपिया कमावत हे। सोनम के जइसे 100 आन महिला मन घलोक डेनेक्स कटेकल्याण म काम करत हें अऊ आर्थिक स्वावलंबन के इतिहास रचत हें। जनवरी महिना ले लेकर अब तक डेनेक्स कटेकल्याण ले 45 हजार ले जादा कपड़ा बेंगलुरू भेजे गए हे अऊ नवा आर्डर मिले ले काम सरलग चलत हे।
छत्तीसगढ़ शासन ह सोनम जइसे महिला मन के जोश अऊ जुनून ल देखत डेनेक्स के पांचवा यूनिट ल छिंदनार म खोले के मंजूरी दे देहे हे ताकि छत्तीसगढ़ के मातृशक्ति सरलग बढ़त रहय अऊ प्रदेश महिला सशक्तीकरण के दिशा म नवा मुकाम ल हासिल करयं।
