श्रीमती सोनिया गांधी ह मुख्यमंत्री श्री भूपेश बघेल ले छत्तीसगढ़ म कोविड-19 के तीसर लहर अऊ ओमिक्रान वेरिएंट के रोकथाम के तैयारी के बारे म बात करिन

रायपुर, देश म बाढ़त कोरोना संक्रमण ले चिंतित श्रीमती सोनिया गांधी ह काली छत्तीसगढ़ के मुख्यमंत्री भूपेश बघेल ले छत्तीसगढ़ राज्य म कोरोना के तीसर लहर अऊ ओमिक्रॉन संक्रमण के रोकथाम के तैयारी मन के संबंध फोन म चर्चा करके जानकारी लीन।
मुख्यमंत्री श्री भूपेश बघेल ह बताइस कि राज्य के कुछ शहरी इलाका मन म जइसे रायगढ़ अऊ रायपुर म कोरोना संक्रमित मन के संख्या बाढ़े हे। छत्तीसगढ़ राज्य बर ओमिक्रान के टेस्टिंग सेंटर ओडिशा निरधारित करे गए हे। सैम्पल टेस्टिंग बर ओडिशा भेजे जात हे, फेर उहां सेंपल के संख्या जादा होए के सेती टेस्टिंग म देरी होवत हे। श्री बघेल ह बताइस कि राज्य म अभी तक ओमिक्रान के कोनो केस नइ मिले हे। उमन कहिन कि राज्य सरकार कोति ले संक्रमण के रोकथाम अऊ प्रभावित मन के इलाज के जम्‍मो व्यवस्था करे गए हे। राज्य म आरटीपीसीआर टेस्ट लगातार तेजी ले कराए जात हे अऊ पाजिटीव पाए गए मनखे मन के इलाज घलोक लगातार करे जात हे।
मुख्यमंत्री ह श्रीमती सोनिया गांधी ल भरोसा देवाईन के राज्य म कोरोना संक्रमण के रोकथाम बर गाइडलाइन के पालन सुनिश्चित करे के समझाईश देहे के संगेच सार्वजनिक जगा अऊ कार्यक्रम मन म भीड़-भाड़ के रोकथाम अऊ मास्क लगाय जइसे ऐहतियाती कदम उठाए गए हे। राज्य के अस्पताल अऊ स्वास्थ्य केन्द्र मन म बेड, आईसोलेशन वार्ड, आक्सीजन आदि के बेहतर व्यवस्था सुनिश्चित करे गए हे।