श्री सोनमणि बोरा ह नगरीय प्रशासन अउ विकास विभाग के प्रमुख सचिव के पदभार संभालिन

रायपुर, भारतीय प्रशासनिक सेवा के वरिष्ठ अधिकारी श्री सोनमणि बोरा (भा.प्र.से.-1999) ह काली छत्तीसगढ़ शासन के नगरीय प्रशासन अउ विकास विभाग के प्रमुख सचिव के पदभार ग्रहण कर लीन। राज्य शासन के सामान्य प्रशासन विभाग कोति ले 18 अगस्त 2026 के जारी आदेश के तहत श्री बोरा ला नगरीय प्रशासन अउ विकास विभाग के प्रमुख सचिव बनाए गे हे। एखर पहिली ऊमन प्रमुख सचिव, आदिम जाति विकास विभाग, अनुसूचित जाति विकास विभाग अउ पिछड़ा वर्ग एवं अल्पसंख्यक विकास विभाग के जिम्मेदारी संभालत रहिन। उमन विज्ञान अउ प्रौद्योगिकी विभाग के उपरहा प्रभार के जिम्मेदारी घलो संभालत हवयं।
पदभार संभाले के बाद श्री बोरा ह विभागीय अधिकारी मन ले विभाग के योजना, कार्यक्रम अउ दूसर कामकाज के जानकारी लीन। ए मौका म विभाग के संचालक श्री रिमिजियुस एक्का, सूडा के मुख्य कार्यपालन अधिकारी श्री सुमीत अग्रवाल, उप सचिव श्री भागवत जायसवाल, अपर संचालक श्री पुलक भट्टाचार्य, मुख्य अभियंता श्री राजेश शर्मा, संयुक्त संचालक श्री मिथिलेश अवस्थी, उप संचालक श्री अरुण साहू, सूडा के उप मुख्य कार्यपालन अधिकारी श्री सुनील अग्रहरि अउ अधीक्षण अभियंता श्री रमेश सिंह के संग दूसर अधिकारी मन ह ऊंखर सुवागत करिन अउ विभागीय काम-काज के बारे म बताइन।
जानबा हे के राज्य बने के बाद रायपुर ला राजधानी के रूप म संवारे म श्री बोरा के बड़ भूमिका रहे हे। उमन रायपुर नगर पालिक निगम, आरडीए अउ बीडीए के आयुक्त अउ सीईओ रहि चुके हवंय। ऊंखर लम्हा प्रशासनिक अनुभव ले रायपुर अउ बिलासपुर के नगर विकास के संग कवर्धा, जांजगीर-चांपा, मुंगेली अउ बिलासपुर जइसे जिला मन के विकास म घलो ऊंखर खास योगदान रहिस। श्री बोरा के कार्यकाल म सफाई मित्र योजना, बूढ़ातालाब संग दूसर तरिया मन के संवर्धन, विकास अउ पुनरोद्धार के संग रायपुर के महादेव घाट म मूर्ति विसर्जन खातिर जगा तय करेके काम सुरू कराए गे रहिस। नगरीय इलाका मन म स्कूल मन के कायाकल्प करे गीस। रायपुर नगर निगम म जनम अउ मउत पंजीयन ला ऑनलाइन कराए गिस, लेखा-जोखा के काम ला सॉफ्टवेयर आधारित बनाए गिस। संग म संचालन-संधारण (ओ एंड एम) के काम ला प्रिवेंटिव काम के रूप म सामिल करे जइसे काम ऊंखर प्रमुख उपलब्धि रहिस।
नगरीय प्रशासन अउ विकास विभाग नगरीय निकाय मन के जरिए नागरिक मन ला बुनियादी सुविधा देहे अउ सहर के विकास ले जुड़े योजना मन ला चलाए अउ पूरा करे म बड़का भूमिका निभाथे। श्री बोरा के पदभार संभाले ले विभागीय काम मन ला अउ तेजी मिले अउ नगरीय विकास के काम म बने तालमेल होए के उम्मीद हे। अधिकारी मन ले गोठ-बात करत श्री बोरा ह कहिन के जनता ले जुड़े विभागीय कार्यक्रम अउ बुनियादी सुविधा ले संबंधित योजना मन ला पहिली प्राथमिकता देहे जाना चाही।