धमतरी, 10 अगस्त 2020। डीजीपी के कहे ले प्रदेश म शुरु करे गे स्पंदन अभियान के तहत सोमवार के नक्सल ग्रस्त नगरी के मेचका थाना के एसपी राजभानू ह भ्रमण करिस अउ सीएएफ के संग म सीआरपीएफ के जवान मन ले मिल के उखर मनोबल बढ़हाईस अउ उखर पीरा ला घलो जानिस। ओमन उपस्थित जम्मो अधिकारी मन ल जवान मन के समस्या के निराकरण करे बर आदेश दिस।
एखर संग ही उहां उपस्थित अधिकारी मन ल कहिस कि बेरा-बेरा म अधीनस्थ जवान मन के समस्या के निराकरण करय अउ कोई समस्या ह ओखर स्तर म निराकरण योग्य नई हे तेला बेरा म सुरता करा के निराकरण कराय। अउ मौजूद जवान मन ला तनाव म रहि के कोनो भी काम ल झन करय, अउ अपन मनोबल ल बढ़हा के रखे कहिके समझाईस देवत हुए परिवार ले दूरिहा रहे के स्थिति म मोबाइल ले संपर्क बनाए रखे , शारीरिक स्वच्छता बर नित्य खेलकूद, योग आने काम अउ बारिश के मौसम ल देखत आसपास स्वच्छ वातावरण बनाए रखे साफ-सफाई ल लेके विशेष ध्यान दे बर निर्देशित करिस ये दौरान जिला बल, छत्तीसगढ़ सशस्त्र बल अउ केंद्रीय रिजर्व पुलिस बल के अधिकारी अउ कर्मचारी गण उपस्थित रहिस ।
