मुख्यमंत्री के घोषणा म अमल: विशेष पिछड़ी जनजाति के 80 युवा मन ल मिलिस सरकारी नौकरी

मंत्री श्री मोहम्मद अकबर ह 80 विशेष पिछड़ी जनजाति बैगा युवा मन ल सौंपिन नियुक्ति प्रमाण पत्र
कबीरधाम, मुख्यमंत्री श्री भूपेश बघेल के घोषणा के मुताबिक प्रदेश के कबीरधाम जिला म बैगा जनजाति के 80 शिक्षित युवा मन ल शिक्षा, राजस्व, सहायक शिक्षक, पशुपालन विभाग म परिचारक अऊ भृत्य के पद म नियुक्ति प्रदान करे गए हे। जिला कार्यालय कबीरधाम के सभाकक्ष म वन अऊ जलवायु बदलाव मंत्री व कवर्धा विधायक श्री मोहम्मद अकबर ह 80 विशेष पिछड़ी जनजाति बैगा युवा मन ल नियुक्ति प्रमाण पत्र प्रदान करिन।
मुख्यमंत्री श्री भूपेश बघेल के अगुवई म राज्य सरकार कोति ले सामाजिक, आर्थिक अऊ शैक्षणिक रूप ले पिछड़े विशेष पिछड़ी जनजाति मन ल सामाजिक उत्थान के दिशा म ए वर्ग के पढ़े लिखे युवक-युवति मन ल चतुर्थ अऊ तृतीय वर्ग शासकीय नौकरी म सीधा भर्ती देहे जात हे। विशेष पिछड़ी जनजाति के शिक्षित युवा मन ल योग्यतानुसार शासकीय नौकरी देहे के मुख्यमंत्री के घोषणा म अमल करत कबीरधाम जिला के विशेष पिछड़ी जनजाति के 80 बैगा युवा मन ल शासकीय सेवा म तृतीय अऊ चतुर्थ श्रेणी कर्मचारी के पद म नियुक्त करे गए हे।