विशेष पिछड़ी जनजाति मन के बदलही तस्वीर

रायपुर, 17 फरवरी 2024। मुख्यमंत्री श्री विष्णु देव साय के मार्गदर्शन म तैयार करे गए बजट म विशेष पिछड़ी जनजाति के सदस्य मन बर 300 करोड़ रुपिया के प्रावधान रखे गए हे। ए बजट प्रावधान ले छत्तीसगढ़ म रहइया बिरहोर, पहाड़ी कोरवा, बैगा, कमार अऊ अबूझमाड़िया मनखे मन ल बुनियादी सुविधा मन के लाभ मिल पाही। घास-फूस के घर के जगा ओ मन पक्का घर म रही सकहीं। पेयजल के बने सुविधा होही। अभी अधिकांश विशेष पिछड़ी जनजाति के बस्ति मन म पानी दूर ले लाना होथे। कई पइत ए जनजातीय समुदाय के मनखे झिरिया आदि ले पानी पीथें। अशुद्ध पेयजल के सेती बीमारी पनपथे।
देश म पहली पइत ए विशेष पिछड़ी जनजाति मन के विकास बर प्रधानमंत्री जनमन योजना बनाय गए। ये योजना प्रधानमंत्री श्री नरेन्द्र मोदी ह भगवान बिरसा मुंडा के जन्मस्थली उलिहातु ले शुरू करे रहिन। छत्तीसगढ़ म ए योजना म तेजी ले क्रियान्वयन होवत हे अऊ मुख्यमंत्री श्री विष्णु देव साय एखर उपर सीधा नजर रखे हवंय। बीते महिना मुख्यमंत्री ह रायगढ़ जिला म बिरहोर बस्ति के दौरा घलोक करे रहिन। उमन इहां प्रधानमंत्री जनमन योजना के क्रियान्वयन के स्थिति देखीन। मुख्यमंत्री ह ए बस्ति मन म रहइया मनखे मन ले गोठ बात घलोक करिन। ए बस्ति मन म रहइया मनखे मन ल योजना मन के लाभ मिलते रहय, एखर बर सरलग कैंप लगाये जात हे। विशेष पिछड़ी जनजाति बर 300 करोड़ रुपिया के बजट उपलब्‍ध हो जाय ले अब ए इलाका मन म तेजी ले विकास हो सकही। ये योजना ए पाए के घलोक जरूरी रहिस काबर के ए जनजाति मन के भौगोलिक परिवेश बहुत कठिन हे। जिहां बस् बसे हे उहां तक पेयजल के सुविधा उपलब्‍ध करा पाना अउ आन बुनियादी सुविधा दे पाना चुनौती होत रहिस फेर मुख्यमंत्री श्री साय के दृढ़ संकल्प के आगू रद्दा आसान हो गए हे।