विशेष पिछड़ी जनजाति बसाहट मन म नान्हें लइका मन बर बनिस पीएम जनमन आंगनबाड़ी केंद्र - हांका

जशपुर, मुख्यमंत्री श्री विष्णु देव साय ह निर्देश दीन के जशपुर जिला के विशेष पिछड़ी जनजाति पहाड़ी कोरवा परिवार मन ल केन्द्र अऊ राज्य सरकार के सबो योजना मन के लाभ मिलय। इही पहल के अंतर्गत बगीचा विकासखंड के ग्राम दर्रीपारा कुटमा म सर्वसुविधायुक्त पीएम जनमन आंगनबाड़ी केंद्र बनके तैयार हो गए हे।
इहां विशेष पिछड़ी जनजाति पहाड़ी कोरवा परिवार मन के लइका उत्साह ले आंगनबाड़ी पहुंचत हें। लइका मन ल रोजेच तात जेवन, सरलग स्वास्थ्य जांच, बौद्धिक विकास अऊ पहिली प्राथमिक शिक्षा जइसे सुविधा उपलब्ध कराए जात हे। महिला अऊ बाल विकास विभाग ले मिले जानकारी के मुताबिक, जिला म पीएम जनमन योजना के तहत कुल 17 आंगनबाड़ी केंद्र स्वीकृत करे गए हे। एमां बगीचा विकासखंड म 16 अऊ मनोरा विकासखंड म 1 आंगनबाड़ी केंद्र सामिल हे।
जिला प्रशासन के ए पहल ले लइका मन के स्वास्थ्य अऊ शिक्षा म सुधार होही, संगें-संग पहाड़ी कोरवा परिवार के लइका मन ल शिक्षा ले जोडके ऊंखर जीवन स्तर म सकारात्मक बदलाव लाए जा सकही।