बैगा परिवार मन के पक्का मकान के सपना होवत हे साकार

कबीरधाम, 18 फरवरी 2024। विशेष पिछड़ी जनजाति मन ल मुख्यधारा ले जोड़े अऊ ओ मन ल सबो मूलभूत सुविधा उपलब्‍ध कराए के काम शुरू करे बर प्रधानमंत्री जनमन योजना के छत्तीसगढ़ म तेजी ले क्रियान्वयन होवत हे। मुख्यमंत्री श्री विष्णु देव साय के मार्गदर्शन म कबीरधाम जिला म ए योजना के तहत बैगा परिवार मन बर 3 हजार 554 आवास के स्वीकृति दे गए हे, एमां ले 2 हजार 996 पका घर बनवाए बर पहिली किस्त के रूप म 11 करोड़ 98 लाख रूपिया जारी कर दे गए हे।
कबीरधाम जिला के विकासखण्ड बोड़ला म 179 अऊ पंडरिया के 77 गांव मन म बैगा परिवार के बाहुलता हे। ए परिवार मन बर बोड़ला विकासखण्ड म 2081 अऊ पंडरिया विकासखण्ड म 1474 आवास के स्वीकृति दे गए हे। बैगा परिवार ल पहिली चरण म 2996 आवास निर्माण बर पहली किस्त के रूप म 40-40 हजार रूपिया के राशि जारी करे गए हे। एखर अलावा योजना म ए गांव मन म बुनियादी सुविधा बिजली, पानी, सड़क, शिक्षा, स्वास्थ्य संग आन मूलभूत सुविधा उपलब्‍ध कराए जाही। जेखर से विेशेष पिछड़ी जनजाति के सामाजिक-आर्थिक स्थिति म सुधार आही।
योजना के तहत कबीरधाम जिला म जेकर पक्का मकान बने हे तेन अंतराम बैगा ल बीते दिन श्रीफल भेंट करके सम्मानित करे गीस। अंतराम बैगा विशेष पिछड़ी बैगा जनजाति परिवार ले हे। वो अइसन पहिली हितग्राही हे, जेकर पक्का घर बनाए के काम शुरू कर दे गए हे। वो ह बताइस कि पक्का मकान बनाए बर दस कॉलम खड़े हो गए हे।
जानबा हे कि प्रधानमंत्री जनमन योजना के तहत बैगा परिवार ल घर बनवाए बर 2 लाख रूपिया के राशि 4 किस्त म दे जाही। पहली किस्त घर शुरू करे बर 40 हजार रूपिया, दुसर किस्त लेंटर स्तर म होए म 60 हजार रूपिया, तीसर किस्त रूफ टॅाप के निर्माण म 80 हजार रूपिया अऊ घर पूरा होए म 20 हजार रूपिया दे जाही। एखर अलावा महात्मागांधी राष्ट्रीय ग्रामीण रोजगार गारंटी योजना के तहत 95 दिन के मजदूरी के भुगतान तको करे जाही।