नई दिल्ली के स्वतंत्रता दिवस समारोह म विशेष अतिथि के रूप म सामिल होही लखपति दीदी खिलेश्वरी

महिला मन ल आत्मनिर्भर बनाए खातिर प्रदेश के महिला मन ल करत हे प्रेरित
लखपति दीदी योजना के संचालन खातिर जताइस आभार
बालोद, जिला के गुण्डरदेही विकासखण्ड के ग्राम गब्दी के खिलेश्वरी ह अपन मेहनत अऊ लगन ले न केवल आत्मनिर्भरता के मिसाल कायम करे हे, बल्कि अब वो नई दिल्ली म आयोजित होवइया स्वतंत्रता दिवस समारोह म विशेष अतिथि के रूप म सामिल होवइया हे। लखपति दीदी के रूप म अपन पहिचान बनइया खिलेश्वरी के ये उपलब्धि पूरा बालोद जिला बर गरब के विसय हे। नई दिल्ली म 15 अगस्त 2025 के आयोजित होवइया 79वां स्वतंत्रता दिवस समारोह म खिलेश्वरी के विशेष अतिथि के रूप म सामिल होना एक ऐतिहासिक क्षण होही। 
जिला के गुण्डरदेही विकासखण्ड के ग्राम गब्दी के खिलेश्वरी, दीनदयाल अंत्योदय योजना राष्ट्रीय ग्रामीण आजीविका मिशन ‘बिहान’ अंतर्गत के तहत गठित जय संतोषी स्व-सहायता समूह के सदस्य हे जेकर परिवार कुछ समय पहिली किसानी मजदूरी उपर निर्भर रहिस फेर खिलेश्वरी देवांगन के अपन परिवार ल आगू बढ़ाए के ललक ह ओ ल एक नवा मुकाम दीस। वो ह अपन मेहनत अऊ उद्यमशीलता ले ग्रामीण अर्थव्यवस्था म बदलाव के एक नवा कहानी लिखे हे। वो ह बिहान योजना के अंतर्गत मुर्गीपालन अऊ किराना दुकान के संचालन शुरू करिस, जेखर से वो ह अपन परिवार के आर्थिक स्थिति ल मजबूत करे हे, संगेच लाखों रूपिया के वार्षिक आय अर्जित करके लखपति दीदी के खिताब हासिल करे हे।
वो ह सबले पहिली दीनदयाल अंत्योदय योजना राष्ट्रीय ग्रामीण आजीविका मिशन ‘बिहान’ ले जुरिस, तेखर पाछू महिला मन के संगठन तैयार करके वित्तीय साक्षरता सामुदायिक स्त्रोत मनखे के रूप म वोला चुने लेहे गीस एखर से वो ह महिला मन ल वित्तीय साक्षर बनाए के काम करे लगिस। ए काम के माध्यम ले 02 करोड़ ले जादा के राशि क्षेत्र के समूह मन ल बैंक करजा देवाए म वो ह सहयोग करिस। ए सेवा बर वोला हर महिना 6360 रू. राशि मानदेय के रूप म मिलत हे अऊ खेती काम के संगे-संग वो ह मुर्गीपालन, मछलीपालन, किराना दुकान, फैन्सी स्टोर्स जइसे गतिविधि घलो चालू करिस। खिलेश्वरी ल अब सबो गतिविधि मन के माध्यम ले कुल 04 लाख 60 हजार रूपिया वार्षिक आय प्राप्त होवत हे।
कभू घर तक सीमित रहइया खिलेश्वरी देवांगन अपन दृढ़ इच्छाशक्ति अऊ दीनदयाल अंत्योदय योजना (बिहान) के सहयोग ले आज ‘‘लखपति दीदी’’ के रूप म पहिचान बनाए हे अऊ क्षेत्र के आन महिला मन बर प्रेरणा के स्त्रोत बनके उभरे हे। खिलेश्वरी ह प्रधानमंत्री श्री नरेन्द्र मोदी अऊ मुख्यमंत्री श्री विष्णु देव साय ल हिरदे ले धन्यवाद देवत कहिस के शासन के ए योजना मन ह मोला आत्मविश्वास अऊ संसाधन दीस। मुर्गीपालन अऊ किराना दुकान ह मोर जीवन ल बदलिस अऊ आज मोला दिल्ली म स्वतंत्रता दिवस समारोह म सामिल होए के मौका मिलत हे। ये मोर बर बहुत बड़का सम्मान हे। खिलेश्वरी ह जिला प्रशासन बालोद के आभार व्यक्त करत कहिस के प्रशासन के सरलग सहयोग ले ही ये संभव हो पाए हे के ग्रामीण महिला मन अब आत्मनिर्भर बनके अपन अलग पहिचान बनावत हें।