गंभीर बीमारी ले जुझत जिला के 113 मरीज मन बर योजना बनिस संजीवनी
बिलासपुर, राज्य शासन कोति ले प्रदेश के नागरिक मन के स्वास्थ्य के बारे म चेत करत बनाए गए मुख्यमंत्री विशेष स्वास्थ्य सहायता योजना जरूरतमंद मनखे मन बर उम्मीद के नवा किरन लेके आए हे। ये योजना म गंभीर अउ दुर्लभ बीमारी मन के उपचार बर 20 लाख रूपिया तक विशेष उपचार सहायता मनखे मन ल देहे जाथे। छत्तीसगढ़ एकमात्र अइसे राज्य हे जिहां इलाज बर अतका बड़का राशि मनखे मन ल देहे जात हे। जरूरतमंद मनखे मन बर ये योजना संजीवनी साबित होवत हे। जिला म मुख्यमंत्री विशेष स्वास्थ्य सहायता योजना के तहत साल 2021 म 77 मनखे लाभान्वित होए हे अउ ये साल महिना जनवरी ले अब तक 36 मनखे लाभान्वित होए हें।
मोपका के 6 बछर के लइका सात्विक राय बर घलोक ये योजना कोनो वरदान ले कम नइ हे। सात्विक एक गंभीर त्वचा रोग एपिडर्मोलिसिस बुलोसा ले ग्रसित हे। ये एक दुर्लभ बीमारी हे। जेखर इलाज म अड़बड़ पइसा के जरूरत परथे। सात्विक के पिता प्रदीप कुमार ह बताइस कि ओ ल ये योजना के बारे म जानकारी मिलीस। मुख्यमंत्री विशेष स्वास्थ्य सहायता योजना म आवेदन करे के दू महिना के भीतर ही 15 लाख रूपिया राज्य शासन कोति ले सात्विक के इलाज बर स्वीकृत हो गे। वो ह सात्विक के इलाज क्रिश्चन मेडिकल कॉलेज वेल्लोर म करवाइस। इलाज के बाद सात्विक के स्थिति अभी ठीक हे। प्रदीप कुमार राज्य शासन ल धन्यवाद देवत कहत हे कि जरूरतमंद मनखे मन बर ये योजना काफी मददगार साबित होवत हे। वो ह बताइस कि ये योजना ले मुख्यमंत्री श्री भूपेश बघेल ह प्रदेश के बड़का तबका के स्वास्थ्य के सुध लेहे हें। सात्विक के इलाज बर अतका बड़का राशि सकेल पाना वोखर बर कतई संभव नइ रहिस। शासन कोति ले देहे गए मदद ले आज वोखर लइका के इलाज हो पाए हे। प्रदेश के नागरिक मन ल दुर्लभ अउ गंभीर बीमारी मन बर नगद रहित उपचार के लाभ देवाए के दिशा म ये योजना एक महत्वपूर्ण कदम ये।