विशेष गहन पुनरीक्षण के समय बीएलओ उपर हमला, आरोपी गिरफ्तार- दुर्ग जिला प्रशासन ह करिस जल्दी कार्रवाई

बीएलओ के सुरक्षा ठउका करे पुलिस ल दीन कड़क निर्देश
छत्तीसगढ़ सहायक गुरूजी फेडरेशन ह करिस जिला प्रशासन के कार्रवाई के सराहना, सौंपिन धन्यवाद ज्ञापन
दुर्ग, भारत निर्वाचन आयोग के हुकुम के मुताबिक 01 जनवरी 2026 के अर्हता तारीक के संदर्भ म जारी विशेष गहन पुनरीक्षण (एसआईआर) के समय भिलाई नगर विधानसभा क्षेत्र म बूथ लेवल अधिकारी (बीएलओ) उपर हमला करे के गंभीर घटना आगू आए हे। प्रशासन अऊ पुलिस ह जल्दी कार्रवाई करत आरोपी ल गिरफ्तार करके भारतीय न्याय संहिता के कठोर धारा मनके तहत प्रकरण दर्ज करे हे।
25 नवंबर 2025 के विधानसभा क्षेत्र 65 भिलाई नगर के बूथ नंबर 117 म कार्यरत बीएलओ श्री रूपेश कुमार उपर आरोपी जावेद हुसैन ह शराब के नशा म अनायास हमला कर दीस। ये हमला राष्ट्रीय महत्व के शासकीय काम म बाधा उत्पन्न करे वाला पाए गीस। घटना के जानकारी मिलतेच सहायक निर्वाचक रजिस्ट्रीकरण अधिकारी ह घायल बीएलओ ल तुरंत सुपेला अस्पताल म भर्ती कराइस, बाद म ओखर उपचार जिला अस्पताल दुर्ग म करे गीस। कलेक्टर अऊ जिला निर्वाचन अधिकारी श्री अभिजीत सिंह अस्पताल पहुंचके श्री रूपेश जोशी ले मुलाकात करिन अऊ मुख्य चिकित्सा अऊ स्वास्थ्य अधिकारी/सिविल सर्जन ल बेहतर इलाज ठउका करे के निर्देश दीन। कलेक्टर ह पुलिस ल सबो क्षेत्र मन म सरलग पुलिस पेट्रोलिंग बर आदेश दीन। बीएलओ श्री रूपेश के स्वास्थ्य के स्थिति अब सामान्य हे। सुरक्षा ल ध्यान म रखत ओ ल तुरंत बीएलओ काम ले मुक्‍त करे गीस अऊ वोखर जगा म आन कर्मचारी के ड्यूटी लगाए गइस। जिला म जम्‍मो बीएलओ के सुरक्षा ठउका करे बर जरूरी निर्देश पुलिस ल देहे गए हे।