- लाइन म लगके सोशल डिस्टेंसिंग बनात यात्री मन ह स्वास्थ्य जांच कराईन
- 14 दिन होम क्वेरेंटाइन म रइहीं, स्टेशन के प्लेटफार्म ल सैनिटाइज करे गीस
- यात्री मन ल कई जगा मन म छोडे बर बस के घलोक करे गीस व्यवस्था
रायपुर, 13 मई 2020। नई दिल्ली ले आज भिनसरहा पहली पईत लाकडाउन के बेरा म स्पेशल राजधानी एक्सप्रेस रायपुर पहुंचिस। यात्री मन के स्टेशन म स्वास्थ्य जांच, थर्मल स्क्रीनिंग अऊ पल्स आक्सीमीटर ले जांच करे गीस। यात्री मन के स्वास्थ्य जांच बर 17 टीम लगाए गए रहिस। ये मां ले 12 टीम रायपुर अवईया यात्री मन बर दरवाजा तीर अऊ 5 टीम रायपुर ले बिलासपुर जवइया यात्री मन बर जुन्ना मुख्य दरवाजा तीर लगाए गए रहिस। यात्री मन के तापमान के संगें-संग पल्स अउ आक्सीजन सांद्रता के घलोक जांच करे गीस।
सबो यात्री मन ह लाइन म लगके सोशल डिस्टेंसिंग बनात अपन स्वास्थ्य के जांच कराईन अऊ ओखर बाद स्टेशन ले बाहिर निकलिन। सबो यात्री मन ल हिदायत देहे गीस के ओ मन 14 दिन होम क्वेरेंटाइन म रहंय अऊ कोरोना ले बचाव अउ रक्षा बर सबो निर्देश मन के पालन करंय। सबो यात्री मन के हाथ म होम क्वेरेंटाइन के स्टैम्प घलोक लगाए गीस। संयुक्त संचालक स्वास्थ्य सेवाएं डॉ. सुभाष मिश्रा खुदे ये बेरा म उपस्थित रहिन।
यात्री मन ल शहर के कई जगा मन म छोडे बर इहां नगर निगम के तरफ ले बहुत अकन बस के व्यवस्था घलोक करे गए रहिस। अइसनहे रेल के आए के पहिली स्टेशन के प्लेटफार्म ल सैनिटाइज करे गीस। ये बेरा म जिला पंचायत के मुख्य कार्यपालन अधिकारी डॉ. गौरव कुमार सिंह, एडीएम श्री विनीत नंदनवार, अकतहा पुलिस अधीक्षक श्री तारकेश्वर पटेल संग रेलवे के वरिष्ठ अधिकारी गण डीआरएम श्री एस एस गुप्ता, सीनियर डीसीएम श्री टी मुखोपाध्याय, स्टेशन डायरेक्टर श्री बीपीटी राव घलोक उपस्थित रहिन। यात्री मन के पता घलोक नोट करे गीस जेखर से होम क्वेरेंटाइन के समय बेरा-बेरा म पुलिस अउ स्वास्थ्य विभाग कोति ले उंखर जांच करे जा सकय।
