समय म मिले खाद-बीज ले युवा किसान बृजपाल के खेती होइस आसान

बने फसल के भरोसा म करत हे उन्नत किसिम के खाद के छिड़काव
कोरबा, जिला के दूरस्थ क्षेत्र जटगा पंचायत के आश्रित ग्राम रवागांव के युवा किसान बृजपाल पोर्ते किसानी ले अपन परिवार के भरण-पोषण करथे। कम जमीन होए के बाद घलो ओ ह सरलग मेहनत अऊ सकारात्मक सोच के संग हर बछर खरीफ मौसम म भरपूर फसल पाए के उदीम करथे।
खरीफ सीजन चालू होतेच बृजपाल अपन पत्नी के संग खेत मन म मेहनत करके फसल उत्पादन म जुट गए हे। ए साल ओ ल सहकारी समिति जटगा ले बेरा म उन्नत किसिम के बीज अऊ जरूरी खातू जइसे यूरिया अऊ डीएपी मिलीस, जेखर से ओ ल खेती के शुरुआत करे म आसानी होइस। पोर्ते ह बताइस के खाद-बीज प्राप्त करे म ओ ल कोनो प्रकार के कठिनाई नइ होइस। नइ त समिति के घेरी-बेरी चक्कर लगाय परय अऊ कई पईत ले सामान के कमी के सामना करना परय। एसो सहकारी समिति म किसान मन बर समुचित मात्रा म कृषि आदान के उपलब्धता ठउका करे गए हे।
अभी हाल म बृजपाल अपन पत्नी के संग धान के फसल के देखरेख म भिड़े हे। आज उमन खेत म डीएपी अऊ यूरिया के छिड़काव करिन, जेखर से फसल के बढ़वार सुचारु होवय अऊ उत्पादन म बढ़ोतरी होवय। उमन भरोसा जताइन के ए साल उपज बने होही। बृजपाल ह कहिस के खेती ही ऊंखर जीवनयापन के प्रमुख साधन हे अऊ ओ मन पूरा मनोयोग ले मेहनत करत हे ताकि ए साल बेहतर फसल प्राप्त कर परिवार के जरूरत मन के पूर्ति कर सकंय।