राष्ट्रीय आदिवासी महोत्सव म भाग लेहे श्रीलंका के दल पहुंचिस रायपुर

कलाकार मन ह कहिन छत्तीसगढ़ घर जइसे
रायपुर, रायपुर के साइंस कालेज मैदान म शुरू होवत राष्ट्रीय आदिवासी नृत्य महोत्सव म अपन कला के प्रदर्शन करे श्रीलंका के 12 सदस्यीय दल आज रायपुर पहुंच गए हे। श्रीलंका दल के सदस्य मन ह रायपुर पहुंचे म खुशी जाहिर करिन अऊ कहिन कि इहां आके बहुत अच्छा महसूस होवत हे। इहां के मौसम श्रीलंका जइसे ही हे। इहां के मनखे अऊ श्रीलंका के निवासी मन के रंग-रूप, कद-काठी करीबन समान ही हे। वेशभूषा घलोक मिलता-जुलता हे। छत्तीसगढ़ के समान ही श्रीलंका म घलोक धान अऊ चाय के उत्पादन बहुतायत होथे। इहां पहुंचे म बहुत अच्छा आवभगत होइस। श्रीलंका के दल प्रमुख सुश्री उमा श्रीधरन ह बताइस कि ओखर निवास स्थान मध्य श्रीलंका म हे अऊ उंखर भाखा तमिल हे। सत्य साईं कलालयम नाम के उंखर संस्था हे। इही संस्था के 12 कलाकार रायपुर म आयोजित राष्ट्रीय आदिवासी नृत्य महोत्सव म अपन कला के प्रदर्शन करे आए हे।