मुख्यमंत्री श्री बघेल ह संत कवि श्री पवन दीवान के नाम ले राज्य अलंकरण पुरस्कार देहे के करिन घोषणा

रायपुर, मुख्यमंत्री श्री भूपेश बघेल आज संझा राजधानी रायपुर के समता कॉलोनी स्थित विप्र भवन म विप्र सांस्कृतिक भवन प्रबंध समिति कोति ले आयोजित ‘संत कवि पवन दीवान’ श्रद्धांजलि सभा अउर सम्मान समारोह म सामिल होइन। उमन कार्यक्रम म श्रद्धांजलि अर्पित करत ऊंखर सम्मान म संत कवि श्री पवन दीवान के नाम ले कविता लेखन के क्षेत्र म राज्य अलंकरण पुरस्कार प्रदाय करे के महत्वपूर्ण घोषणा करिन। ये पुरस्कार अवईया राज्य अलंकरण समारोह ले हर बछर देहे जाही।
मुख्यमंत्री श्री बघेल ह ये बेरा म साहित्य अऊ कविता लेखन के क्षेत्र म विशिष्ठ योगदान बर छत्तीसगढ़ के कवि अऊ साहित्यकार मन ल सम्मानित घलोक करिन। एमां पद्मश्री डॉ. सुरेन्द्र दुबे ल विप्रकुल गौरव शिखर सम्मान-2023 ले नवाजे गीस। अइसनहे श्री अरूण कुमार निगम ल अऊ श्री काशीपुरी कुन्दन ल संत कवि पवन दीवान स्मृति अस्मिता सम्मान ले पुरस्कृत करे गीस। हर एक ल पुरस्कार स्वरूप 21-21 हजार रूपिया के राशि अऊ शॉल अउर श्रीफल भेंट करके सम्मानित करे गीस। उमन ये मौका म विप्र योग पत्रिका अऊ विप्र महाविद्यालय के मासिक बुलेटिन के विमोचन घलोक करिन।
कार्यक्रम ल कृषि मंत्री श्री रविन्द्र चौबे अऊ मुख्यमंत्री के सलाहकार श्री प्रदीप शर्मा ह घलोक सम्बोधित करिन। कार्यक्रम म आभार प्रदर्शन श्री राकेश चतुर्वेदी ह करिन। ये बेरा म रायपुर नगर निगम के महापौर श्री एजाज ढेबर, छत्तीसगढ़ योग आयोग के अध्यक्ष श्री ज्ञानेश शर्मा, श्री सुरेन्द्र शर्मा, श्री नरेन्द्र तिवारी, सुश्री विभा तिवारी संग आन गणमान्य मनखे उपस्थित रहिन।