- श्रमिक, छात्र, संकट म पड़े अऊ चिकित्सा के आश्यकता वाले मनखे मन ल मिलही सुविधा
- ट्रेन म आए बर लिएऑनलाइन करना होही एप्लाई
- राज्य सरकार ह ऑनलाइन के संकली करिस जारी
- जिहां जादा मनखे हे उहां अनुमति के बाद कई चरण म चलही ट्रेन
रायपुर, 09 मई 2020। मुख्यमंत्री श्री भूपेश बघेल के पहल अऊ निर्देशन म लाकडाउन के कारण आन राज्य मन म फंसे छत्तीसगढ़ के श्रमिक, छात्र, संकट म परे मनखे मन या चिकित्सा के जरूरत वाले मनखे मन के छत्तीसगढ़ वापसी के रद्दा साफ हो गए हे। छत्तीसगढ़ सरकार ह 4 श्रमिक स्पेशल ट्रेन ल कन्फर्म कर देहे हे। ए ट्रेन मन म आए बर मनखे मन ल राज्य सरकार कोति ले जारी एप्प म एप्लाई करना होही।
छत्तीसगढ़ सरकार ह ये एप्प के कड़ी जारी कर देहे हे। ए ट्रेन मन म आन राज्य म फंसे म छत्तीसगढ़ के श्रमिक, छात्र, संकट म परे मनखे मन या चिकित्सा के जरूरत वाले मनखे मन ल ही सफर के अनुमति होही।
राज्य सरकार ह कहे हे के जऊन जिहां हे, उहां स्थानीय प्रशासन के संपर्क म रहंय। जे मन घर वापसी बर ऑनलाइन रजिस्ट्रेशन नइ कराए हें वो मन लउहे अपन रजिस्ट्रेशन करावंय। जइसे जइसे रेलवे अऊ संबंधित राज्य ले अनुमति मिलते जाही ट्रेन के संचालन करे जाही। जिहां जादा मनखे हे उहां अनुमति के बाद कई चरण म ट्रेन चलाए जाही।
छत्तीसगढ़ सरकार ह जऊन 4 ट्रेन ल कन्फर्म करे हे ओमां पहली ट्रेन पठानकोट पंजाब ले चांपा, दुसर ट्रेन साबरमती अहमदाबाद ले बिलासपुर, तीसर ट्रेन साबरमती अहमदाबाद ले बिलासपुर अऊ चौथइया ट्रेन विजयावाड़ा आन्ध्रप्रदेश ले बिलासपुर सामिल हे।
राज्य सरकार ह ए ट्रेन म सफर बर आनलाइन कड़ी जारी करे हे-
http:cglabour.nic.in/covid19MigrantRegistrationService.aspx
ये कड़ी म एप्लाई करके मनखे ट्रेन के माध्यम ले छत्तीसगढ़ वापस आ सकहीं। एखर अलावा 24 घंटा संचालित हेल्पलाइन नम्बर 0771-2443809, 9109849992,7587821800,7587822800,9685850444,9109283986 अऊ 8827773986 म संपर्क करे जा सकत हे।