हेल्प लाइन नम्बर ले 11 हजार 584 ले जादा श्रमिक मन के समस्या मन के होइस लउहे समाधान
रायपुर, 02 अप्रेल 2020। लॉकडाउन ले प्रभावित छत्तीसगढ़ प्रदेश के आन राज्य मन म फंसे स्थानीय मजदूर मन बर राज्य सरकार मुख्यमंत्री श्री भूपेश बघेल के हुकुम म एक अप्रेल संझा 4 बजे तक संकटग्रस्त 11 हजार 584 श्रमिक मन के आन 20 राज्य मन म संकट के स्थिति म होए के संबंध म सम्पर्क करे गीस। राज्य शासन कोति ले 31 मार्च अऊ एक अप्रेल तक कुल 11 हजार 581 श्रमिक मन बर ठहरे, भोजन आदि के व्यवस्था कई माध्यम ले करवाए गीस। ये मां 31 मार्च तक 6 हजार 934 श्रमिक अऊ एक अप्रेल के संझा 4 बजे तक 4 हजार 647 श्रमिक मन ले सम्पर्क करके ऊंखर रहे-खाए के संगें-संग आन जरूरी सामान के व्यवस्था करवाए गीस। जानबा हे के राज्य सरकार कोति ले देश के आन राज्य मन म श्रमिक मन के समस्या मन के जल्दी निराकरण बर अधिकारी मन के दल गठित करके सतत् निगरानी करे जात हे। एखर बर श्रम विभाग कोति ले राज्य स्तर हेल्पलाइन नम्बर 0771-2443809, 91098-49992, 75878-22800 संग जिला स्तर म घलोक हेल्पलाइन नम्बर स्थापित करे गए हे। हेल्पलाइन नम्बर के माध्यम ले मिले श्रमिक मन के समस्या मन ल पंजीबद्व करके तुरंते यथासंभव समाधान करे जात हे।
श्रम विभाग के अधिकारी मन ह बताइन के लॉकडाउन के सेती उपजे परिस्थिति मन म संकटग्रस्त अउ जरूरतमंद श्रमिक मन के समस्या मन के जल्दी निराकरण करे जात हे। छत्तीसगढ़ के 22 जिला के श्रमिक 20 आन राज्य मन म फंसे होए के जानकारी मिले रहिस। सबले जादा श्रमिक उत्तरप्रदेश म 2 हजार 679, महाराष्ट्र म 2 हजार 98, तेलंगाना म एक हजार 743, गुजरात म एक हजार 447, जम्मू म एक हजार 363 अऊ कर्नाटक म 551 श्रमिक मन के फंसे होए के जानकारी मिले रहिस हे। अइसनहे मध्यप्रदेश म 346, ओड़िसा म 226, आंध्रप्रदेश म 187, दिल्ली म 167 अऊ पंजाब म 143 श्रमिक मन के फंसे होए के जानकारी हेल्पलाईन नम्बर संग कई आन माध्यम ले मिले हे।
अधिकारी मन म बताइन के लॉकडाउन के सेती उपजे परिस्थिति मन म संकटग्रस्त या फंसे श्रमिक मन म छत्तीसगढ़ के मुंगेली ले 2 हजार 902, कबीरधाम ले 2 हजार 857, राजनांदगांव ले एक हजार 114, जांजगीर-चांपा ले एक हजार 57, बलोदाबाजार ले 895, बेमेतरा ले 659, रायगढ़ ले 457, बिलासपुर ले 455, बलरामपुर ले 209, महासमुंद ले 205 अऊ कोरबा जिला ले 188 श्रमिक फंसे हें। जिंकर राज्य सरकार के नोडल अधिकारी मन कोति ले आन राज्य मन के प्रशासनिक अधिकारी, कारखाना प्रबंधक, नियोजक अऊ ठेकेदार मन ले समन्वय करके सरलग निगरानी करे जात हे अऊ ऊंखर खाए-पीए, रहे आदि के व्यवस्था ठउका करे जात हे।
