रायपुर, 05 जुलाई 2024। जशपुर जिला के ग्राम बगिया म आयोजित राज्य स्तरीय शाला प्रवेश उत्सव के अवसर म आज इहां छात्र छात्रा मन बर खुशि भरे दिन रहिस। कार्यक्रम म बतौर मुख्य अतिथि प्रदेश के मुखिया अऊ जशपुर के माटी पुत्र मुख्यमंत्री श्री विष्णुदेव साय कार्यक्रम म सामिल होइन। शाला प्रवेशोत्सव म नव प्रवेशी लइका मन के अभिनंदन के संग ओ मन ल उपहार घलव देहे गीस। ए बेरा म मुख्यमंत्री श्री साय ह 9 वीं कक्षा म प्रवेशित छात्रा मन ल निःशुल्क साइकिल के वितरण करिन। छात्रा मन ह साइकिल मिले के खुशी सामूहिक रूप ले साइकिल के घंटी बजाके जाहिर करिन अऊ मुख्यमंत्री श्री साय के आभार जताइन।
ए बेरा म मुख्यमंत्री ह सबो छात्रा मन ल बने सहिन पढ़ई करके बेहतर परिणाम के संग अपन माता-पिता अऊ बगिया संग प्रदेश के नाम रोशन करे के बात कहत उज्ज्वल भविष्य बर शुभकामना दीन। ए अवसर म वित्त मंत्री श्री ओपी चौधरी, रायगढ़ लोकसभा क्षेत्र के सांसद श्री राधेश्याम राठिया, विधायक जशपुर श्रीमती रायमुनी भगत, विधायक पत्थलगांव श्रीमती गोमती साय, विधायक आरंग बिर खुशवंत साहेब, जिला पंचायत अध्यक्ष जशपुर श्रीमती शांति भगत, उपाध्यक्ष श्री उपेन्द्र यादव संग आन जनप्रतिनिधि उपस्थित रहिन।
जानबा हे कि छत्तीसगढ़ सरकार कोति ले निःशुल्क साइकिल वितरण योजना ले छात्रा मन ल मुफ्त साइकिल प्रदान करे जाथे। ए योजना के तहत शासकीय स्कूल म पढ़इया कक्षा 9 वीं के छात्रा मन ल निशुल्क साइकिल प्रदान करे जात हे, ताकि संसाधन मन के अभाव म अऊ दूरी के कारण छात्रा मन अपन पढ़ाई बीच म झन छोड़यं।