पहली पइत छत्तीसगढ़ के पारम्परिक लोक गीत, नृत्य, खेल अऊ छत्तीसगढ़ी व्यंजन एक मंच म
रायपुर, राजधानी रायपुर म 12 ले 14 जनवरी तक आयोजित राज्य युवा महोत्सव म ये पइत 821 आने-आने कार्यक्रम आयोजित करे जाही। राज्य युवा महोत्सव म पहली पइत छत्तीसगढ़ के पारम्परिक लोक गीत, नृत्य, खेल अऊ छत्तीसगढ़ी व्यंजन के आनंद मनखे मन उठा सकहीं। मुख्यमंत्री श्री भूपेश बघेल के हुकुम अऊ खेल अउ युवा कल्याण मंत्री श्री उमेश पटेल के मार्गदर्शन म खेल अउ युवा कल्याण विभाग कोति ले आयोजित युवा महोत्सव म 15 ले 40 साल आयु अऊ 40 साल ले जादा आयु के दू वर्ग म ये सबो प्रतियोगिता मन आयोजित करे जाही। 15 ले 40 साल आयु वर्ग म 613 अऊ 40 साल ले जादा आयु वर्ग म 208 विधा मन म एकर जइसे कुल 821 आने-आने प्रतियोगिता आयोजित होही। ये महोत्सव म छत्तीसगढ़ के परंपरागत गीत, नृत्य, खेल अऊ छत्तीसगढ़ी व्यंजन ल घलोक पहली पइत एक मंच म सामिल करे गए हे।
खेल अउ युवा कल्याण विभाग ले मिले जानकारी के मुताबिक युवा उत्सव म सांस्कृतिक विधा मन म हिंदुस्तानी-कर्नाटक शैली म शास्त्रीय गायन, सितार, बांसुरी, तबला, वीणा, मृदंगम, हारमोनियम, गिटार के वादन, शास्त्रीय नृत्य-मणिपुरी, ओड़िसी, भरतनाट्यम, कत्थक, कूचीपूड़ी के संगें-संग पारम्परिक सुआ नृत्य, पंथी नृत्य, करमा नाचा, सरहुल नाचा, बस्तरिया लोक नृत्य, राउत नाचा के रंग इहां देखे ल मिलही। एखर अलावा पारम्परिक खेल मन म फुगड़ी, भौंरा, गेड़ी दौड़-चाल, रॉक बैण्ड (राज्य स्तर पर) के अलावा छत्तीसगढ़ी संस्कृति ल उजागर करे बर पारम्परिक वेशभूषा प्रतियोगिता, छत्तीसगढ़ी व्यंजन उपर आधारित फूड फेस्टिवल प्रतियोगिता, छत्तीसगढ़ी लोक कला अउ संस्कृति, ऐतिहासिक धरोहर, पारम्परिक अउ आदिवासी शैली ले संबंधित विसय म चित्रकला प्रतियोगिता ल सामिल करे गए हे। ये मां एकांकी नाटक (हिन्दी, अंगरेजी, छत्तीसगढ़ी भाषा), वाद-विवाद (तात्कालिक, समसामयिक विषय), कबड्डी अऊ खो-खो ल घलोक सामिल करे गए हे।
ये युवा उत्सव म राज्य के सबो 27 जिला मन ले 6 हजार 521 भाग लेवइया सामिल होवत हें। एमां 3 हजार 613 पुरूष, 2 हजार 433 महिला भाग लेवइया अऊ 301 पुरूष अऊ 174 महिला अधिकारी-कर्मचारी सामिल हें। बालोद जिला ले 285, बलौदाबाजार-भाटापारा ले 272, बलरामपुर-रामानुजगंज ले 142, बेमेतरा ले 287, बीजापुर ले 146, बिलासपुर ले 185, दंतेवाड़ा ले 215, धमतरी ले 317, दुर्ग ले 173, गरियाबंद ले 234, बस्तर ले 191, जांजगीर-चांपा ले 184, जशपुर ले 241, कबीरधाम ले 337, कांकेर ले 140, कोण्डागांव ले 170, कोरबा ले 368, कोरिया ले 209, महासमुंद ले 308, मुंगेली ले 178, नारायणपुर ले 339, रायगढ़ ले 263, रायपुर ले 334, राजनांदगांव ले 290, सरगुजा ले 298, सुकमा ले 112 अऊ सूरजपुर जिला ले 303 भाग लेवईया मन ल मिलाके कुल 6521 भाग लेवईया ये महोत्सव म सामिल होहीं।
