रायपुर, मुख्यमंत्री श्री भूपेश बघेल ले आज इहां ऊंखर निवास कार्यालय म कृषि मंत्री श्री रविन्द्र चौबे ह सौजन्य मुलाकात करिन। उमन नइ दिल्ली म आयोजित स्टेट ऑफ द स्टेट कॉनक्लेव 2019 म छत्तीसगढ ल ‘सर्वोत्तम समावेशी विकास के क्षेत्र म उत्कृष्टतम प्रदर्शन’ बर देहे गए पुरस्कार के ट्राफी मुख्यमंत्री श्री बघेल ल सौंपिन। कृषि मंत्री श्री चौबे ह छत्तीसगढ़ के तरफ ले ये पुरस्कार ग्रहण करे रहिन।
मुख्यमंत्री ह ये उपलब्धि बर कृषि मंत्री संग प्रदेशवासी, अधिकारी मन अऊ कर्मचारी मन ल बधाई अऊ शुभकामना दीन। उमन ये उपलब्धि बर प्रदेशवासी मन ल बधाई देवत कहिन कि हमार राज्य म ‘गढ़बो नवा छत्तीसगढ़’ के नारा के संग नवा आर्थिक मॉडल अपनाए गए हे। अइसन अर्थव्यवस्था अपनाए गए हे, जेखर केंद्र म गांव हे। आज जब पूरा देश म मंदी छाए हे, छत्तीसगढ़ के बाजार म रौनक हे। राज्य सरकार कोति ले किसान मन के कर्ज माफी, 2500 रुपिया प्रति क्विंटल म धान खरीदी के संग समाज के सबो वर्ग के उन्नति बर योजना अऊ कार्यक्रम चालू करे गए हे। राज्य के सामाजिक अऊ सांस्कृतिक विकास ल सर्वोच्च प्राथमिकता दिए जात हे। शिक्षा अऊ स्वास्थ्य जइसे मूलभूत अधोसंरचना मन ल मजबूत करे बर चौतरफा कदम उठाए जात हे। ये बेरा म विधायक सर्वश्री देवव्रत सिंह, श्री शिशुपाल सोरी अऊ श्री खेलसाय सिंह घलोक उपस्थित रहिन।
