रायपुर, 6 जुलाई 2020। प्रदेश के सबो सरकारी प्राइवेट अउ अनुदान प्राप्त स्कूल मन के प्रार्थना म अब राज्य गीत अरपा पैरी के धार ल घलो गाये जाही. शिक्षा विभाग ह राज्य गीत अरपा पैरी के धार ल प्रार्थना म शामिल करे के निर्णय ले हे. स्कूल खुले के बाद अब छात्र राष्ट्रगीत राष्ट्रगान के संग प्रदेश के राज्य गीत ल घलो गावत नजर आही. राज्य गीत ल प्रार्थना म शामिल करे बर शिक्षा विभाग ह सबो जिलाधिकारी मन ल निर्देश जारी कर दे हे. अब ये आदेश प्रदेश के सबो स्कूल मन के प्रिंसिपल तक घलो पहुंचा दे गे हे.
बता देथन कि प्रदेश के मुखिया भूपेश बघेल ह पिछला साल अरपा पैरी के धार ल राज्य गीत घोषित करे रहिस, जोन ल डॉ नरेंद्र देव वर्मा ह लिखे हे. ये राज्य गीत म छत्तीसगढ़ के संस्कृति के बखान करे गे हे. राज्य गीत के प्रार्थना म शामिल हो जाये ले अब प्रदेश के सबो स्कूल मन के बच्चा हर दिन राज्य के संस्कृति ले जुड़ही. एखर संग ही प्रदेश के नदिया अरपा, पैरी अउ महानदी ल घलो जानही.
