रायपुर, 16 मार्च 2020। मुख्य सचिव श्री आर.पी.मण्डल कोति ले राज्य गीत के प्रचार-प्रसार अउ हथकरघा कारीगर मन ल पंदोली देहे खातिर शासकीय कार्यक्रम मन म ‘अरपा पैरी के धार, महानदी हे अपार’ बिने कोसा सिल्क लुगरा या बंडी कुरथा मन ल सुरता चिनहा के रूप म भेंट देहे बर उपयोग करे के हुकुम देहें हें। मुख्य सचिव कोति ले ये संबंध म आज प्रदेश के सबो अपर मुख्य सचिव, प्रमुख सचिव, सचिव, विभागाध्यक्ष, सबो संभागायुक्त अउ कलेक्टर मन ल दिशानिर्देश भेजे गए हे।
भेजे गए चिट्ठी म लिखाए हे के राज्य शासन कोति ले डॉ. नरेन्द्र देव वर्मा के रचित छत्तीसगढ़ी गीत ‘अरपा पैरी के धार, महानदी हे अपार’ ल राज्य गीत घोषित करे गए हे। छत्तीसगढ़ राज्य हथकरघा विकास अउ विपणन सहकारी संघ कोति ले टसर कोसा, सूती सिल्क के लुगरा अऊ शॉल, स्टोल, साफा म हथकरघा के माध्यम ले राज्यगीत बुनवाए गए हे। कोसा सिल्क साड़ी म राज्य गीत हाथ के बुनाई के अकतहा हाथ ले कढाई, मशीनी कढाई अउ प्रिंट के माध्यम ले घलोक उकेरे गए हे। एला सुरता चिनहा के रूप म भेंट देहे बर परयोग करे जा सकत हे।
संघ के ये उदीम ले जिहां राज्य गीत के व्यापक प्रचार-प्रसार होए हे, उहें बुनाई-कढाई के माध्यम ले राज्य के कुशल कारीगर मन ल रोजगार घलोक मिलत हे। ये उत्पाद बिलासा हैण्डलूम एम्पोरियम जी.ई. रोड रायपुर म विक्रय बर उपलब्ध हे।
