रायपुर, राजधानी रायपुर म पाछू महीना आयोजित नेशनल ट्राईबल डांस फेस्टिवल म अपन जौहर देखाय के बाद बस्तर के युवा अब एक पइत फेर राज्य युवा महोत्सव म अपन प्रतिभा देखाय बर तियार हें। राज्य युवा महोत्सव राजधानी म 12 ले 14 जनवरी तक आयोजित हे। युवा महोत्सव म ये पइत बस्तर के कलाकार मन ल सिरिफ नाचे भर नहीं भलुक एकल कला अऊ खेल प्रतिभा ल घलोक राज्य स्तर म देखाय के मौका मिलही। ये महोत्सव म बस्तर जिला के करीबन दू सौ युवा हिस्सा लेवत हें।
राज्य युवा महोत्सव म भाग लेहे बर युवा अऊ कलाकार मन के चयन 21 नवम्बर के जगदलपुर के कुम्हरावण्ड म आयोजित जिला स्तरीय युवा महोत्सव म करे जा चुके हे। दरअसल रायपुर म 27 ले 29 दिसम्बर तक आयोजित नेशनल ट्राईबल डांस फेस्टिवल म बस्तर के कलाकार मन ल मान अऊ सम्मान के संगेच अंतर्राष्ट्रीय स्तर के मंच ले किलेपाल के गौर मांडिया नृत्य म पहिली स्थान मिले रहिस, एकर से घलोक बस्तर के युवा जादा उत्साहित हें। युवा महोत्सव म लोक नृत्य श्रेणी म जिला के दरभा के 15 ले 40 अऊ 40 ले जादा आयु वर्ग म दू दल मन के 84 कलाकार हिस्सा लेहीं। बस्तर के सुआ नृत्य, बास्तानार के बस्तहरिया नाचा, बकावण्ड के नाटक दल अऊ बस्तर के लोकगीत के प्रस्तुति राजधानी म होही। एखरे संग एकल प्रस्तुति मन म जगदलपुर के निधि रावल के कत्थक, प्रभा दुबे के हिन्दुस्तानी शास्त्रीय गायन, दरभा के कोया के बांसुरी वादन, जगदलपुर के विजय पटेल के तबला वादन, दरभा के देवेन्द्र सिंह के हारमोनियम वादन, बस्तर के प्रियांशु के गिटार वादन, लोहण्डीगुड़ा के याकुब बघेल के भरतनाट्यम, जगदलपुर के स्तर बघेल के पारम्परिक वेशभूषा, बस्तर के आंचल वर्मा के चित्रकला के प्रस्तुति होही। निबंध म करण बघेल, वाद-विवाद म करण सिंह अऊ मनप्रीत सिंह संधु अऊ क्विज प्रतियोगिता म जगदलपुर के बेनू बघेल अऊ सावन नेताम हिस्सा लेहीं। एखर संगेच खेल श्रेणी म लोहाण्डीगुड़ा अऊ तोकापाल के कब्बड़ी अऊ खो-खो के टीम राज्य युवा महोत्सव म हिस्सा लेही।
आप मन जानतेच हव के मुख्यमंत्री श्री भूपेश बघेल के मार्गदर्शन म ट्रायबल डांस फेस्टिवल के जइसे राज्य युवा महोत्सव ल घलोक भव्य स्वरूप देहे जात हे। युवा महोत्सव म 15 ले 40 साल अऊ 40 साल ले जादा आयु के दू वर्ग म ये सबो प्रतियोगिता आयोजित करे जाही। 15 ले 40 साल आयु वर्ग म 613 अऊ 40 साल ले जादा आयु वर्ग म 208 विधा मन म एकर जइसे कुल 821 कई ठन प्रतियोगिता आयोजित होही, जेमां राज्यभर के साढ़े छै हजार ले जादा युवा हिस्सा लेवत हें। ये महोत्सव म छत्तीसगढ़ के परम्परागत गीत, नृत्य, खेल अऊ छत्तीसगढ़ी कलेवा मन ल घलोक पहली पइत एक मंच म सामिल करे गए हे।