रायपुर, 23 मार्च 2020। मुख्यमंत्री श्री भूपेश बघेल ह कोरोना वायरस कोविड-19 के संक्रमण ले बचाव बर प्रदेशवासी मन ल घरे म रहे के अपील करे हें।
मुख्यमंत्री ह कहे हें के आप मन जिम्मेदार नागरिक आव, अइसन कोनो काम झन करव जेखर से संक्रमण के संभावना बाढ़ जाय, आप मन अपन जिम्मेदारी निभावव। जइसे-जइसे थर्ड स्टेज नजदीक आवत हे, आंकड़ा बाढ़त जात हे। अभी छत्तीसगढ़ म एके पॉजिटिव केस मिले हे अऊ वहु कंट्रोल म हे। ये छत्तीसगढ़ के मनखे मन के जागरूकता ले ही संभव हो सके हे। थोरकेच दिन 31 मार्च तक अऊ सहयोग देवव।
प्रदेश के आम नागरिक, व्यापारी, मीडिया संग सबो मन ह जइसे सहयोग पाछू 3 दिन म देहे हव वइसनेहेच 31 मार्च तक सहयोग देवव काबर के बचाव म ही सबके सुरक्षा हे।
