मुख्यमंत्री के निर्देश के होइस जल्दी अमल, कलेक्टर ह करिस पहल
रायपुर, कोरबा जिला के दूधपीयत नोनी प्रनिधि भले ही अभी एक महिना के हे फेर अभी ले ओखर स्थाई जाति प्रमाण पत्र बन गे। अनुसूचित जनजाति वर्ग ले अवइया प्रनिधि के पिता अनिल कुमार कंवर अऊ माता श्रीमती अनिता कंवर घलोक खुश हे। पिता अनिल ल तो ये बात के बहुत खुशी हे कि प्रदेश के सरकार ह जन्म के संगेच लइका मन के स्थाई जाति प्रमाण पत्र बनाए के फैसला लेहे हे, नइ तो अनिल कंवर ल मालूम हे कि पहिली जाति प्रमाण पत्र बनवाए बर बहुत मुश्किल के सामना करना परत रहिस। ओला बनेच सुरता हे कि ओला अपन स्थाई जाति प्रमाण पत्र कतका उदीम करे ले कोर्ट कचहरी के चक्कर काटत बनवाये ल परे रहिस। मिसल निकलवाए, वंशवृक्ष बनवाए के संग पटवारी प्रतिवेदन ले लेके नोटरी कराए म कई दिन तो लगेच रहिस, रूपिया खरचा होए के बाद छै महिना बर अस्थाई जाति प्रमाण पत्र ही बन पाए रहिस। अपन अस्थाई जाति प्रमाण पत्र ल स्थाई बनवाए अऊ फेर सत्यापन कराए बर ओला संझा के ट्रेन ले कोरबा ले रायपुर जाना परिस। रायपुर म जाति सत्यापन वाले कार्यालय के तीर रात गुजारे ल परिस। मुंधरहा होतेच लाइन तक लगाना परे रहिस।
अइसन म अपन एक महिना के बेटी प्रनिधि के स्थाई जाति प्रमाण पत्र आसानी ले बनके मिलइ ओखर बर समय, रूपया अऊ एक प्रकार से जाति प्रमाण पत्र बनवाए के तनाव ले मुक्ति पाये जइसे हे। कुछ अइसनेच कहानी ग्रामीण रमेश कंवर के हे। अपन छै महिना के बेटा दीपांशु के स्थाई जाति प्रमाण पत्र अपन हाथ म आना ओकर बर एक उपलब्धि अऊ राहत के जइसे हे।
कोरबा जिला के करतला विकासखंड़ के ग्राम पठियापाली निवासी रमेश कुमार कंवर अऊ श्रीमती रोहिणी कंवर ल अपन पुत्र दीपांशु कंवर के अऊ ग्रामीण अनिल कंवर अऊ अनिता कंवर ल अपन पुत्री प्रनिधि कंवर के स्थाई जाति प्रमाण पत्र प्रदेश के स्कूल शिक्षा, अनुसूचित जाति, जनजाति आन पिछड़ा वर्ग अऊ अल्प संख्यक कल्याण, सहकारिता विभाग, मंत्री छग शासन अऊ जिला के प्रभारी मंत्री डॉ प्रेमसाय सिंह टेकाम के हाथ जइसेच मिलीस, इहां उपस्थित भीड़ ह जोरदार ताली बजाके ये पहल के सराहना करिन। अपन-अपन पुत्री अऊ पुत्र ल स्थाई जाति प्रमाण पत्र बहुत आसानी ले मिले म खुशी जाहिर करत ग्रामीण अनिल कंवर अऊ रमेश कुमार ह बताइस कि स्कूल, कालेज के संग कोनो योजना के लाभ उठाए म प्रमाण पत्र के जरूरत होही। भविष्य म ओला अपन लइका मन के जाति प्रमाण पत्र बनवाए बर दौड़ धूप नइ करना परही। उमन बताइन कि स्थाई जाति प्रमाण पत्र बनवाए बर ओला आवेदन के संग अपन स्थाई जाति प्रमाण पत्र, अऊ लइका के जन्म प्रमाण पत्र ही लगाना परिस। गांव के पटवारी धीरेन्द्र कुमार ह बताइस कि शासन कोति ले लइका मन के जन्म के संगेच स्थाई जाति प्रमाण पत्र बनवाए के पहल करे गीस। ये योजना के लाभ गांव म एक महिना के बच्ची प्रनिधि, छह महिना के दीपांशु संग आन लइका मन ल मिलीत हे।
जिला म 9 हजार ले जादा छै महिना के लइका मन ल मिलही लाभ
मुख्यमंत्री श्री भूपेश बघेल कोति ले प्रदेश म जन्म के संगेच स्थाई जाति प्रमाण पत्र प्रदान करे के निर्देश देहे गये हे। ये दिशा म कलेक्टर श्रीमती किरण कौशल कोति ले कोरबा जिला म पाछू छै महिना के भीतर जन्मे सबो लइका मन के सूची तियार करके स्थाई जाति प्रमाण पत्र बनवाए के दिशा म कार्यवाही करे जात हे। करतला के ग्राम पठियापाली के दीपांशु अऊ प्रनिधि संग आन लइका मन के घलोक स्थाई जाति प्र्रमाण पत्र कलेक्टर के निर्देशन म बनाके कोरबा जिला म एखर शुरूआत कर दिए हे। कुल नौ हजार 111 लइका मन ल एकर लाभ मिलही।
