स्टॉपडेम सैकड़ों किसान मन के फसल बर बनिस संजीवनी

जांजगीर-चांपा, 26 अगस्त 2021। मुख्यमंत्री श्री भूपेश बघेल के हुकुम के मुताबिक राज्य सरकार के फ्लैगशिप योजना मन के क्रियान्वयन के जमीनी हकीकत के जायजा लेहे बर मुख्यमंत्री सचिवालय के वरिष्ठ अधिकारी मन सरलग जिला मन के दौरा करत हें। इही कड़ी म आज अपर मुख्य सचिव श्री सुब्रत साहू अऊ विशेष सचिव डॉ.एस.भारतीदासन ह जांजगीर-चांपा जिला के पामगढ़ ब्लॉक स्थित गांव जेवरा पहुंचिन। उमन इहां जेवरानाला म बने स्टॉपडेम के अवलोकन करिन। ये स्टॉपडेम 2 करोड़ 8 लाख रूपिया के लागत ले बरसात ले पहिली बनके तियार होए हे। ये स्टॉपडेम अभी हाल म आस-पास के किसान मन के खरीफ के फसल ल बचाय बर संजीवनी बन गए हे। सैकड़ों किसान पानी ले लबालब ये स्टॉपडेम ले पानी लेके अपन खेत मन के सिंचाई करत हें। अपर मुख्य सचिव श्री साहू अऊ विशेष सचिव डॉ. भारतीदासन ह स्टॉप डेम के गुणवत्ता अऊ उपयोगिता ल सहराईन। ये बेरा म कलेक्टर श्री जितेन्द्र कुमार शुक्ला, जिला पंचायत के मुख्य कार्यपालन अधिकारी श्री गजेन्द्र सिंह अऊ आन अधिकारी उपस्थित रहिन।
अपर मुख्य सचिव ह कहिन के सुराजी गांव योजना के नरवा विकास कार्यक्रम के उद्देश्य जल के संरक्षण, भूजल संवर्धन, निस्तार व लिफ्ट के संग किसान मन ल सिंचाई सुविधा उपलब्‍ध कराना हे। उमन जेवरानाला म बने स्टॉपडेम जइसे आन संरचना मन के निर्माण उपयुक्त स्थल के चयन करके प्राथमिकता ले कराए के निर्देश दीन, ताकि किसान पानी लिफ्ट करके सिंचाई कर सकयं। उमन कहिन के एखर से दू फसल के खेती ल बढ़ावा मिलही। किसान मन के आमदनी बाढ़ही। उमन कहिन के राज्य शासन सिंचाई सुविधा के विस्तार बर लिफ्ट एरिगेशन ल बढ़ावा देवत हे। ये मौका म उमन किसान मन ले घलोक गोठ-बात करिन। किसान मन अऊ गांव वाले मन ह स्टॉपडेम के निर्माण बर शासन-प्रशासन के आभार जताइन अऊ कहिन कि एखर से ओ मन ल फायदा होए हे।