बेमेतरा, राज्य सरकार के महत्वाकांक्षी योजना, सुराजी गांव योजना- नरवा, गरूवा, घुरूवा अउ बाड़ी अंतर्गत बाड़ी लगाय ले बाढ़े आमदनी ले बेमेतरा जिला के मनीराम के जीवन म खुशहाली आ गए हे। बेमेतरा विकासखण्ड के ग्राम दमईडीह निवासी किसान मनीराम चन्द्राकर ह बताइस कि ओ ह करीबन एक एकड़ म साग भाजी के खेती करत हे। पहिली वो मुंगफली, जोंधरी (भुट्टा), चेंचभाजी अउ चौलई लगात रहिस। फेर सरकार के नरवा, गरूवा, घुरूवा अउ बाड़ी योजना आए के बाद उद्यानिकी विभाग के तकनीकी सलाह ले जुन्ना बाड़ी के पुनरोद्वार करिस। एखर बर बीज, खाद, रासायनिक दवा अऊ वर्मी बेड कोति ले बाड़ी ल बने सहिन बना के उन्नत किसिम के साग-भाजी रमकेरिया (भिण्डी), तूमा (लौकी), तरोई, मिरचा, बरबट्टी अउ चेंच भाजी लगाए हे। बाड़ी ले पहिली फसल रमकेरिया (भिण्डी), बरबट्टी अउ भाजी के होइस। जेला स्थानीय व्यापारिक केन्द्र- दाढ़ी बाजार म रमकेरिया (भिण्डी) 450 रूपिया, बरबट्टी 90 रूपिया अउ भाजी 60 रूपिया म बेंचके कुल 600 रूपिया कमाईस।
मनीराम के बताती पाछू 20 दिन ले, हरेक दूसरईया दिन वो ह साग भाजी बेंचत हे अउ अब तक एकर ले 13 हजार 80 रूपिया कमाई कर डरे हे। मनीराम ह सरकार कोति ले संचालित नरवा, गरूवा, घुरूवा अउ बाड़ी के बड़ई करत सरकार के आभार व्यक्त करे हे।
