बेटी के शौक पूरा करे शुरू करिन मशरूम उत्पादन, साल भर म होइस लाख रूपिया के कमई
मशरूम के खेती ले एसएचजी दीदी ल मिलीस जीवन के नवा उड़ान
दुर्ग, 15 जुलाई 2024। दुर्ग जिला के छोट कन गाँव मतवारी म रहइया जागृति साहू के कहानी प्रेरणा ले भरे हे। पढ़े-लिखे जागृति ह दू विषय म पोस्टग्रेजुएट अऊ बी.एड. के डिग्री प्राप्त करे हे। बचपन ले ही जागृति के सपना रहिस के वो एक शिक्षक बनय, फेर किस्मत ह कुछ अऊ ही लिखे रहिस। वो अपन ए सपना ल पूरा नइ कर पाए रहिस, जेखर से वो निराश हो गए रहिस।
जागृति के पति श्री चंदन साहू के बताती के शिक्षक नइ बन पाय ले जागृति के व्यवहार म बहुत बदलाव आइस। निराशा के सेती ओ ह जादा बात घलोक नइ करत रहिस। ओ कहिथे के ’’मैं ओ समय सोचेंव के कोनो काम म व्यस्त होए ले शायद एकर मन लगय। मोर बेटी अऊ मोला मशरूम बहुत पसंद रहिस त मैं ह ओ ल मशरूम के खेती करे के सुझाव देंव। बेटी के पसंद के सेती जागृति ह ये काम चालू करिस। देखतेच देखते बेटी के छोट कन पसंद बर शुरू करे काम जागृति ल उंचाई तक ले गे। धीरे-धीरे, वो ह अपन रुचि ल बढ़ात हर्बल गुलाल अऊ घरेलू समान बनाना शुरू करिस। साल 2019 म, जागृति ह 33 लाख रुपिया के मशरूम बेचिस, जेन वोखर मेहनत अऊ समर्पण के परिणाम रहिस। जागृति ह अपन संग अऊ महिला मन ल घलोक मुनाफ़ा देवाइस। ओ ह अपन आस पास के गाँव के दीदी मन ल घलोक प्रशिक्षण देके स्वावलंबन के रद्दा देखाईस।‘’
जागृति के सफर इहें नइ रुकिस। जागृति ह शासन के योजना मन के लाभ ले अऊ एक सामान्य महिला ले अपन अलग पहिचान बनाइस। मशरूम के खेती ले नवा ऊँचाइ प्राप्त करे म ओ ल “मशरूम लेडी ऑफ़ दुर्ग” कहे जाय लगिस। जागृति के सफ़र एक सामान्य महिला ले लेके लखपति दीदी बने अऊ आज ड्रोन दीदी के रूप म कृषि ल उन्नति के कोति ले जात हे।
प्रधानमंत्री श्री नरेंद्र मोदी के पहल नमो ड्रोन दीदी म वोकर चयन होगे अउ वो ह ड्रोन चलाय के प्रशिक्षण लीस। आज वो एक प्रमाणित ड्रोन पायलट हे अऊ ‘ड्रोन दीदी’ के नाम ले जाने जाथे। ड्रोन के माध्यम ले वो खेत मन म दवइ के छिड़काव करथे अऊ ए नवा तकनीक के लाभ किसान मन तक पहुंचाथे। एखर से किसान मन के समय तो बाचथेच संगे श्रम अऊ खर्च घलोक कम होथे।
जागृति साहू के कहानी हमला सिखोथे के संघर्ष अऊ मेहनत ले हर चुनौती के सामना करे जा सकत हे अऊ सफलता प्राप्त करे जा सकत हे। ओ ह बताथे के शुरू म मनखे वोकर उपर हंसत रहिन अऊ आज वोखर मेहनत अऊ राज्य सरकार अउ केंद्र सरकार के लाभकारी योजना मन के बदौलत मनखे ओखर उदाहरण दे लगे हें।
जागृति शिक्षक तो नइ बन पाईा फेर आज ओ ह कई महिला मन बर व्यवहारिक अउ व्यवसायिक शिक्षक के मिशाल हे। जागृति कई महिला मन ल ड्रोन, मशरूम उत्पादन अउ घरेलू समान मन के उत्पादन संबंधित तकनीकी अउ व्यवसायिक प्रशिक्षण देवत हे। जेखर से वोखर संगे-संग आन महिला मन घलोक स्वावलंबन कोति अग्रसर होवत हे। अपन कौशल अउ सरकार के योजना के माध्यम ले ड्रोन दीदी जागृति ह अपन संगे संग आन महिला मन ल आर्थिक संबल प्रदान करे हे।