सेंटर ह 641 पीड़ित महिला मन ल दीस सहायता, 24 घंटा मिलत हे आपातकालीन सुविधा
रायपुर, सुदूर वनांचल क्षेत्र कोरिया जिला के बैकुण्ठपुर म महिला अऊ बाल विकास विभाग कोति ले संचालित ‘सखी’ वन स्टॉप सेंटर पीड़ित बालिका मन अऊ महिला मन ल सहायता पहुंचाए बर सुरक्षित अऊ सुलभ सहारा के रूप म उभरत हे। घर के भीतर या घर के बाहिर कोनो रूप म पीड़ित अउ संकटग्रस्त महिला ल एके छत के तरी म सबो प्रकार के सुविधा अउ सहायता पहुंचाए बर 1 अपरेल 2017 म ये सेंटर के स्थापना करे गीस। सेंटर म साल 2017 ले अब तक कुल 711 प्रकरण दर्ज करे गए हे। इहां प्रत्यक्ष रूप ले 305 प्रकरण आइस अऊ महिला हेल्पलाईन 181 के माध्यम ले 406 प्रकरण दर्ज करे गीस, एमां ले 641 प्रकरण मन के निराकरण करे जा चुके हे। “सखी“ सेंटर म अब तक कुल 170 महिला मन अऊ बालिका मन ल आश्रय दे गए हे।
“सखी“ सेंटर म पाछू तीन बछर ले पीड़ित महिला मन,बालिका मन ल जरूरत के मुताबिक आपातकालीन सुविधा, चिकित्सा, विधिक सहायता, मनोवैज्ञानिक सलाह, परामर्श सुविधा एके छत के तरी तुरंते उपलब्ध कराए जात हे। इहां महिला मन के समस्या के निदान के पूरा उदीम करे जात हे। आवेदिका के सहमति ले ऊंखर प्रकरण मन म काउसंलिंग करके बहुत अकन परिवार ल जोड़े गए हे, जेखर से ओ मन खुसहाली के संग जीवन यापन करत हें। बहुत अकन महिला मन के घुमन्तु अवस्था म मिले म ऊंखर परिजन मन के पता लगा के उंनला संउपे गए हे। अइसन महिला मन जेकर परिजन के पता नइ चले हे या जेमनन कोनों कारण ले घर नइ लौट सकें हे ओ मन ल स्वधार गृह, उज्जवला होम, नारी निकेतन म आश्रय दे गए हे।
पीड़ित, संकटग्रस्त जरूरतमंद महिला मन अऊ बालिका मन या आन जानकार मनखे प्रत्यक्ष रूप ले सखी सेंटर म प्रस्तुत होके या महिला हेल्लाईन टोल फ्री नंबर (181) या “सखी“ सेंटर के फोन नंबर 07836-233519 म कॉल करके मदद ले सकत हें। इहां सूचना देहे म सूचना देवईया के नाम अउ नंबर गोपनीय रखे जाथे।
